Məlumat verdiyimiz kimi, bu gün Rəqəmsal İnkişaf və Nəqliyyat Nazirliyi yanında Kosmik Agentliyin ("Azərkosmos") İdarə Heyətinin sədri Saməddin Əsədov bir sıra maraqlı açıqlamalar verib.
"Saməddin Əsədov növbəti "AzerSky2" peykinin SpaceX ilə orbitə qaldırıla biləcəyini istisna etməyib. Məlum olduğu kimi, hazırkı "Azersky1" peyki Hindistanın “Polar Satellite Launch Vehicle” daşıyıcı raketi ilə orbitə qaldırılmışdı. Görünür ki, Azərkosmos gələcəkdə Hindistanın bu qurumu ilə əməkdaşlığın davam etdirilməsini nəzərdə tutmur".
Bunu Xeberler.az-a Əsədovun açıqlamlarına münasibət bildirən Azərbaycan İnternet Forumunun prezidenti, ekspert Osman Gündüz deyib.
"Saməddin Əsədov hazırda ən sərfəli şərtlərin İlon Maskın şirkətinə mənsub olduğunu, lakin hələlik hansısa anlaşmaların olmadığını bildirib. Qurumun rəhbəri bununla bağlı tender olacağını açıqlayıb. Bəs yeni müşahidə peykimizin istehsalçısı kim olacaq? Artıq məlumdur ki, "AzerSky1" peykinin istehsalçısı olan Fransanın Airbus Defence and Space şirkəti ilə Azərkosmosun əməkdaşlığının davam etdirilməsi nəzərdə tutulmur. Bir neçə il öncə fəaliyyəti dayandırılan şirkətin bağlandığı da açıqlanıb. Şirkət müqavilə öhdəliklərini başa vuraraq Azərbaycanı tərk edib. Hələlik "Azərkosmos" peykin istehsalçısının hansı ölkə, hansı şirkət olacağını açıqlamayıb. Amma düşünmək olar ki, qurum yeni peykin istehsalını Azərbaycanın hərbi sahədə ən yaxın əməkdaşlıq etdiyi ölkələrlə birgə nəzərdə tutub",-deyə ekspert vurğulayıb.
Ekspert xatırladıb ki, qarşıdan Azərbaycanın ev sahibliyi edəcəyi 74-cü Beynəlxalq Astronavtika Konqresi gəlir. Dünyanın kosmos ailəsinin 5000-dən çox iştirakçısı gələn ilin oktyabrında Bakıya toplaşacaq. Bu tədbirlə bağlı Prezidentin xüsusi sərəncamı var. Baş nazirin rəhbərliyi ilə Təşkilat Komitəsi yaradılıb.
"Güman etmək olar ki, Azərbaycan bu beynəlxalq tədbirədək "AzerSky2" peykinin istehsalçısı və raketdaşıycısı məsələsini həll etsin və Konqres çərçivəsində müqavilələr imzalansın. Yeri gəlmişkən, artıq cari ildə Ermənistan da İspaniyan Satlantis şirkəti ilə birgə tələm-tələsik özünün kiçik ölçülü müşahidə peykini hazırlayıb və "SpaceX" ilə orbitə qaldıraraq kosmos ailəsinə qoşulub. Bir neçə ay öncə Parisdə keçirilən 73-cü Beynəlxalq Astronavtika Konqresdə ermənilər ilk dəfə olaraq nümayəndə statusunda iştirak ediblər. Maraqlıdır, görəsən gələn il Bakıda keçiriləcək Beynəlxalq Astronavtika Konqresinə Ermənistan nümayəndələri qatılacaqmı?".
Xeberler.az
