Bir müddət öncə Fransanın "Airbus Defence and "Space" şirkətinin Azərbaycanı tərk eydiyi açıqlandı.
"Adı çəkilən şirkətin fəaliyyəti indi deyil, xeyli əvvəl, 2018-ci ildən dayandırılıb".
Bunu Xeberler.az-a mövzu ilə bağlı danışan Azərbaycan İnternet Forumunun prezidenti, ekspert Osman Gündüz deyib.
Ekspert xatırladıb ki, 2014-cü ildə "Azerkosmos" və “Airbus Defence and Space” şirkətləri arasında "AzerSky" peykinin "Azərkosmos"un mülkiyyətinə verilməsi haqqında müqavilə imzalanıb. Layihənin dəyəri isə 157 milyon avro olub.
"Bu peykin ömrünün başa çatmasına artıq 3-4 il qalıb. Yeni müşahidə peykinin hazırlanması üçün sifariş zamanı artıq yetişib. Azərkosmos AzerSky-dan təmiz gəlirin 220 milyon dollar olacağını bildirib. Qısa bir araşdırma ilə müəyyən etmək olar ki, adı çəkilən şirkətin fəaliyyəti indi deyil, xeyli əvvəl, 2018-ci ildən dayandırılıb. Şirkət o zaman "AzerSky" peykinin idarəetmə məsələlərinin Azərbaycan tərəfinə öütürülməsi məqsədilə ölkəyə gəlmiş və burada ofis açmışdı.
"AzerSky" müşahidə peykinin idarəetməsi də artıq uzun müddətdir ki, Azərbaycan tərəfindədir",- deyə Osman Gündüz qeyd edib.
Onun sözlərinə görə, adı çəkilən şirkət müqavilə çərçivəsində görüləcək işləri çoxdan başa çatdırıb:
"Güman etmək olar ki, "Airbus Defence and Space" şirkətinin müxtəlif öhdəliklərinin icrasının başa çatması indiki dövrə təsadüf edib və şirkətin Azərbaycan ofisi də hüquqi şəxs olaraq indi ləğv olunaraq VÖEN-ni bağlanıb. Eyni zamanda düşünmək olar ki, "Airbus Defence and Space" in ölkəni tərk etməsi həm də Rəqəmsal İnkişaf və Nəqliyyat Nazirliyinin (RİNN), "Azərkosmos"un gələcəkdə müşahidə peyklərini hazırlamaq üçün Fransanın adı çəkilən şirkəti ilə deyil, fərqli bir ölkə ilə əməkdaşlıq etmək niyyətində olması ilə bağlıdır".
Ekspert deyib ki, Prezident "AzerSky" peykinin imkanlarından Vətən müharibəsi zamanı xeyli effektiv istifadə edildiyini bildirmişdi.
Xatırladaq ki, bir müddət öncə Microsoft-un Azərbaycan ofisində də bütün əməkdaşlar tam tərkibdə işdən azad olunub, öhdəliklərin icrası məqsədilə ofisdə bir nəfər texniki əməkdaş saxlanıb.
