KOSMOS

Məlumat verdiyimiz kimi, Bu gün göydə olan 3 peykimizdən ən bahalısının, "Azerspace-1" peykinin 10 yaşı tamam olur.

"Dünyada baş verən zəlzələlər, müharibələr və müxtəlif qlobal problemlər də peyklərin əhəmiyyətini xeyli artırıb. 8 fevral 2013-cü il tarixdə Azərbaycan özünün ilk "Azerspace-1" telekommunikasiya peykini orbitə qaldıraraq dünya kosmos ailəsinin bir üzvünə çevrilib".

Xeberler.az bildirir ki, bunu Azərbaycan İnternet Forumunun prezidenti, ekspert Osman Gündüz məsələyə münasibət bildirərkən deyib.

Onun sözlərinə görə, peykin ömrünün 15 il olacağı bildirilib. "Azerspace-1" peykinin hazırlanması və orbitə qaldırılmasına 233 milyon dollar sərf olunub, onun 15% -i büdcə vəsaitidir:

""Azerspace-1" ə yatırılan sərmayələrin hansı hissəsinin geri qaytarıldığı və nə zaman gəlirə çıxacağı haqqında dəqiq açıqlamalar hələlik yoxdur. "Azərkosmos" əvvəllər "Azerspace-1"in ömrünün 12-ci ilindən etibarən investisiyaları tam ödəyəcəyini və gəlirlə işləyəcəyini, toplam olaraq 500-600 milyon dollar qazanacağı haqqında açıqlamalar verib. Maraqlıdır ki, gələn il Azərbaycanın "AzerSky1" müşahidə peykinin ömrü də başa çatmalıdır". 

Osman Gündüz qeyd edib ki, peyklərimizin ömrü başa çatmaq üzrədir. Dünyanın kosmos bazarında da situasiya kəskin dəyişib. Rəqabət güclənib, peyk texnologiyaları tam yenilənib, çoxsaylı, kiçik ölçülü peykləri kosmosa göndərən xeyli yeni peyk şirkətləri yaranıb:

"Görünən həm də odur ki, "Azərkosmos" artıq peyklərimizdən birini hazırlayan Fransa şirkəti ilə, onu orbitə qaldıran Hindistan şirkəti ilə əməkdaşlığı dayandırıb.

"Azərkosmos" və Rəqəmsal İnkişaf və Nəqliyyat Nazirliyi( RİNN) hələlik peyklərimizin yenilənməsi ilə bağlı, yeni peyklərin hazırlanmsı və orbitə qaldıracaq şirkətlərlə bağlı, bu sahədə konkret hansı ölkə ilə əməkdaşlıq ediləcəyi haqqında açıqlamalar verməyib. "Azərkosmos" un rəhbəri Saməddin Əsədov peyk bazarında ən sərfəli şərtlərin İlon Maskın SpaceX şirkətinə mənsub olduğunu da açıqlayıb. Beləliklə, milli peyk operatorumuzu qarşıda çətin seçimlər və ciddi işlər gözləyir".

Ekspert xatırladıb ki, bu ilin oktyabr ayında Bakıda 5-6 min nümayəndənin iştirakı ilə Beynəlxalq Astronavtika Konqresi də keçiriləcək. Dünyanın bütün kosmos ailəsi, güman ki, bu ailəyə yeni qoşulan Ermənistan nümayəndələri də oktyabrda Bakıya toplaşacaqlar.