MOBİL RABİTƏ

Azərbaycanda abunəçilərinin sayı 5 milyon nəfərdən artıq olan ölkənin lider mobil operatoru «Azercell» korporativ abunəçilər üçün nəzərdə tutulan internet və danışıq paketlərini yeniləyir.

Xeberler.az xəbər verir ki, şirkətin bir sıra paketlərini əhatə edən yeniləmə nəticəsində paketlərdə təqdim edilən internet həcmi kəskin artırılacaq, danışıq dəqiqələri çoxalacaq.

Yeni paketlərdə danışıq dəqiqələri və qiymətlər dəyişdirilərək daha sərfəli, abunəçilərin tələbatlarına uyğun hala gətirilib.

Məsələn, ölkədaxili 500 dəqiqə və cəmi 0,5 GB interneti olan «Biznes 10» tarif paketini əvəz edən «3GB Biznes» tarifində ölkədaxili dəqiqə sayı 700-ə qaldırılıb, internetin həcmi isə 6 dəfə artırılaraq 3 GB-a çatırılıb.

Bundan başqa, indiyədək qüvvədə olan 20 manatlıq «Biznes 20» paketi ölkədaxili 2000 dəqiqə və cəmi 2GB internet təklif edirdisə, yeni «6 GB Biznes» tarif paketi şirkətdaxili limitsiz danışıq, 1300 ölkədaxili dəqiqə və 6 GB internet təklif edəcək, üstəlik paketin qiyməti də azaldılacaq.

Korporativ abunəçilərinin biznes fəaliyyətini dəstəkləməyi hədəfləyən Azercell bu tariflər çərçivəsində şirkətdaxili danışıqları ödənişsiz əsaslarla təqdim edir.

Eyni zamanda, «Azercell» korporativ abunəçiləri üçün nəzərdə tutulmuş internet paketlərini də dəyişir. İnternet paketlərinin həcmi artırılacaq, qiyməti isə daha sərfəli olacaq. Belə ki, korporativ abunəçilərinin istifadəsi üçün nəzərdə tutulmuş 1 GB, 5 GB, 10 GB, 50 GB internet paketləri ləğv ediləcək. Sentyabrın 5-dən etibarən onları 2 GB, 7 GB, 14 GB və 55 GB paketləri əvəz edəcək. Paketlərin adından da göründüyü kimi, yeni paketlərdə internet həcmi kəskin artırılıb, qiymətlər isə cüzi artırılıb. Belə ki, 1 GB internet paketi 4 manata olduğu halda, qiyməti 6 manat olan 2 GB internet paketi əvəz edib – yəni bura daxil olan 1 GB internetin qiyməti 4 manatdan 3 manata enib. 5 GB paketin 7 GB paketi ilə əvəz edilməsi nəticəsində bu paketə daxil olan GB-ların qiyməti 1,6 manatdan 1,4 manata enib və sair.

Başqa sözlə, «Azercell»in paketlərindəki bu yeniliklər hazırda abunəçilərin ən çox istifadə etdiyi internetin həcminin artması, qiymətinin isə azalması ilə müşayiət olunub.

Sözügedən paketlərin populyarlığını nəzərə aldıqda, bu dəyişikliklərdən «Azercell Biznesin» korporativ istifadəçilərinin böyük bir qismi faydalana biləcəklər.