PROQRAMLAR

Tezliklə dünyadakı məşhurlar öz klonlarından da pul qazana biləcəklər. Xeberler.az bildirir ki, bir qədər əvvəl ABŞ-ın «Genies» şirkəti məşhurların avatarlarının idarə olunması üzrə rəqəmsal agentlik yaradıb. Sözügedən şirkət bu sahədə böyük yeniliyin başlanğıcını qoyub və özünü dünyada ilk rəqəmsal insan irqinin yaradıcısı elan edib. 

Nəzəri olaraq məşhurlar, hansı ki, sponsorlardan böyük pullar alırlar, əslində eyni vaxtda iki yerdə olmaqla, ikiqat qazana bilərlər. «Genies» də bəyan edir ki, həmin şəxslərə belə imkan yaratmağa hazırdır – «onlar özlərinin ikinci «Mən»in idə idarə edə biləcəklər»-deyə şirkət bildirir. 

«Fərqi yoxdur ki, sizin əsas hissəniz hardadır – kortda,  studiyada və sair – «Genies» sizin ola bilmədiyiniz yerdə sizin  şəxsiyyətinizi təmsil etməyə hazırdır». – deyə şirkət göstərdiyi xidmətin detallarını açıqlayır. 

Bu proses artıq başlanıb. Hazırda «Genies» bir sıra məşhurların avatarlarını idarə edir. Onların arasında DJ Khaled, Russell Westbrook, Steve Aoki və başqaları. «Genies» onların rəqəmsal klonlarını idarə edir. 

Maraqlısı odur ki, bu ideya və şirkət əvvəlcə tamamilə fərqli məqsəd üçün yaradılmışdı. «Avatar agentlik» əvvəlcə xəbər tətbiqi kimi yaradılmışdı. Burada xəbərləri avatarlar oxuyur, gündəm xəbərləri avatarlar vasitəsilə təqdim edilirdi.
Şirkət sonradan başa düşdü ki, məşhurları öz brendlərini yaratmağa kömək etməklə daha çox pul qazana bilər. 

Avatarlarla fantaziyaların həddi hüdudu yoxdur. Bu variantda insanlar istənilən brendlərdən istifadə edir. Və onların həmin brendlərə rəğbəti yaranır. Nəticədə həmin şəxslər real həyatda da bu brendlərə üstünlük verməyə başlayırlar. 
 Şirkət bəyan edir ki, bizim fiziki və rəqəmsal dünyalarımız arasında sərhədlərin sürətlə silindiyi bir vaxtda hər bir şəxsin özünü təqdim etməsi üçün avatara ehtiyacı var.  

Hazırda bu sahəni, yəni avatarlara olan hüquqları tənzimləyən,  qanun yoxdur. «Genies» bildirir ki, bu vəziyyət problem yaradır, çünki boşluq imkan verir ki, insanın avatarından onun icazəsi olmadan istifadə edilsin.