TƏDBİRLƏR

Azərbaycan Milli Elmlər Akademiyasının (AMEA) Mərkəzi Elmi Kitabxanasında (MEK) Türkiyənin “Hiperkitap” rəqəmsal platformasının nümayəndələri ilə kitabxana mütəxəssislərinin görüşü keçirilib.

Xeberler.az xəbər verir ki, görüşdə Türkiyənin rəqəmsal kitabxanaçılıq, nəşriyyat və informasiya texnologiyaları sahəsində fəaliyyət göstərən “Hiperlink” şirkətinin direktoru Hayri Yavuz, “Hiperkitap” verilənlər bazasının layihə müdiri İsmayıl İşleyen və şirkətin əməkdaşı Hilmi Oğuz iştirak ediblər.

Tədbirə Azərbaycanın müxtəlif kitabxanalarının rəhbər və nümayəndələri, Bakı Dövlət Universitetinin İnformasiya və sənəd menecmenti fakültəsinin kafedra müdirləri, eləcə də kitabxanaçılıq sahəsində fəaliyyət göstərən müəllimlər qatılıblar.

Görüş çərçivəsində MEK-in direktoru, texnika elmləri doktoru Hüseyn Hüseynov qonaqlarla görüşərək elektron informasiya resurslarının inkişafı, rəqəmsal kitabxana xidmətlərinin genişləndirilməsi və beynəlxalq əməkdaşlıq imkanlarını müzakirə edib.

Azərbaycanın 500-dən çox kitabı “Hiperkitap” platformasında yerləşdirilib

Hüseyn Hüseynov bildirib ki, Azərbaycandan “Hiperkitap” verilənlər bazasına üzv olan ilk kitabxana məhz AMEA-nın Mərkəzi Elmi Kitabxanasıdır. Hazırda MEK tərəfindən təqdim edilən 500-dən artıq kitab platformada geniş oxucu auditoriyasının istifadəsinə verilib.

Direktor qeyd edib ki, dünyanın 100-dən çox universitet və kitabxanasının üzv olduğu platforma ilə əməkdaşlıq Azərbaycan elminin, mədəniyyətinin və nəşrlərinin beynəlxalq səviyyədə tanıdılması baxımından mühüm əhəmiyyət daşıyır.

“Hiperlink” şirkətinin direktoru Hayri Yavuz isə Azərbaycanla əməkdaşlığın genişləndirilməsində maraqlı olduqlarını bildirib. O vurğulayıb ki, Azərbaycan nəşrlərinin beynəlxalq elektron kitab bazalarında daha geniş təmsil olunması ölkənin elmi və mədəni irsinin dünyaya tanıdılmasına əlavə imkanlar yaradacaq.

Platformada süni intellekt texnologiyalarından istifadə olunur

Tədbirdə çıxış edən Hilmi Oğuz Türkiyənin ilk və ən böyük elektron kitab bazası kimi təqdim edilən “Hiperkitap” platformasının imkanları barədə məlumat verib.

Bildirilib ki, platforma elektron nəşrlərin vahid sistemdə toplanmasını, idarə edilməsini və istifadəçilər üçün əlçatan olmasını təmin edir. Bu imkanlar elmi tədqiqat və tədris prosesində elektron informasiya resurslarından istifadəni asanlaşdırır.

Təqdimat zamanı platformada tətbiq olunan süni intellekt texnologiyalarına da diqqət çəkilib. Xüsusilə əski əlifba ilə nəşr edilmiş materialların süni intellekt vasitəsilə tərcüməsi rəqəmsal bazanın üstünlüklərindən biri kimi göstərilib.

Hilmi Oğuz elektron resursların istifadəsi zamanı müəllif hüquqlarının qorunmasının vacibliyini də vurğulayıb.

Görüş çərçivəsində Türkiyədən gələn nümayəndələr MEK-in elektron kitabxana xidmətləri, rəqəmsal informasiya resursları və rəqəmsallaşdırma sahəsində həyata keçirdiyi layihələrlə tanış olublar.

Sonda iştirakçıların sualları cavablandırılıb, Azərbaycan kitabxanalarının, ali təhsil müəssisələrinin və nəşriyyatlarının “Hiperkitap” platforması ilə əməkdaşlığının genişləndirilməsi, həmçinin rəqəmsal kitabxana xidmətlərinin təkmilləşdirilməsi istiqamətində fikir mübadiləsi aparılıb.