EDUTECH

IV Bakı Beynəlxalq Kitab Sərgi-Yarmarkası çərçivəsində Mədəniyyət və Turizm Nazirliyinin dəstəyi ilə həyata keçirilən ALİSA (Automated Library System of Azerbaijan) mərkəzləşdirilmiş elektron kitabxana sistemi layihəsinin təqdimatı olub.

Xeberler.az bildirir ki, elektron kitabxana sistemi proqramı nazirliyin sifarişi ilə Ultra Technologies şirkəti tərəfindən hazırlanıb. İki il əvvəl Azərbaycan Milli Kitabxanasında tətbiqinə başlanan proqram artıq paytaxt və region kitabxanalarında da həyata keçirilir. Bu ilin iyulundan Milli Kitabxanada ALİSA proqramı üzrə region kitabxanalarının əməkdaşları üçün treninqlər təşkil edilib.
Mərasimə nazirliyin Kitab dövriyyəsi və nəşriyyatlarla iş şöbəsinin müdiri Vaqif Bəhmənli, Azərbaycan Milli Kitabxanasının direktoru Kərim Tahirov, IV Bakı Beynəlxalq Kitab Sərgi-Yarmarkasında iştirak edən xarici qonaqlar qatılmışdılar.
"Ultra" şirkətinin biznes xidmətləri qrupunun proqram təminatı komandasının rəhbəri Anar Məmmədov ALİSA layihəsi haqqında ətraflı məlumat verib.

Bildirilib ki, bu proqram Azərbaycan kitabxanalarını vahid bir məkanda birləşdirən - mərkəzləşdirilmiş elektron kitabxana sistemidir: "Sistemin hazırlanması zamanı kitabxana sistemləri üzrə dünya təcrübəsi öyrənilib. Eyni zamanda Azərbaycanın kitabxana sisteminin özünəməxsusluqları da nəzərə alınıb. ALİSA e-kitabxana sisteminin məqsədi mərkəzləşdirilmiş kitabxana və kitabxanalar arasında vahid informasiya bazasının (kitab, qazet, audio və s.) və təsnifatının formalaşdırılması, oxucunun geniş elektron kitab bazasına giriş imkanı, oxucu və kitabxana arasında daha rahat, vaxt itkisi olmadan operativ olaraq münasibətlərin qurulması məqsədlərini özündə birləşdirir".

Bildirilib ki, layihə çərçivəsində xüsusi portal da yaradılıb. Portalda ölkənin bütün kitabxanalarının saytları yer alıb. Burada kitabxana haqqında məlumat almaq, kitabxana ilə bağlı xəbərlər, elanlar və tədbirlərlə tanış olmaq, fonda yeni daxil olan kitablar və s. barədə informasiya əldə etmək olar. Bundan başqa, portalda, oxucular öz rayonlarında yerləşən kitabxanada qeydiyyatdan keçə, sonradan almaq üçün kitab sifariş edə, həmçinin, şəxsi kabinetdə sifariş edilmiş və geri qaytarılmalı olan kitablar barədə məlumat əldə edə bilər. 

Sonda iştirakçıları maraqlandıran suallara cavab verilib.

Ruhəngiz Muradova