TƏDBİRLƏR

Fevralın 29-da Azərbaycan Milli Elmlər Akademiyasının Mərkəzi Elmi Kitabxanasında “AMEA-da elektron elmi-intellektual bazanın yaradılması” mövzusunda konfrans keçirilib.

Akademiyadan Xeberler.az-a verilən məlumata görə, konfransda AMEA-nın elmi müəssisə və təşkilatlarından elmi işlər üzrə direktor müavinləri, elmi katiblər, kitabxanaçılar və İKT üzrə mütəxəssislər iştirak edib.

Tədbiri giriş sözü ilə açan AMEA-nın vitse-prezidenti, akademik İsa Həbibbəyli konfransın əhəmiyyətindən danışıb. Elektron elmi-intellektual bazanın yaradılmasının indiki zamanda elmin əsas tələblərindən olduğunu qeyd edən akademik  gələcəkdə elmi irsin daha etibarlı qorunub saxlanılması və müasir dövrün tələblərinə uyğun şəkildə istifadəsinə  geniş imkanlar yaradacağını bildirib.

Sonra tədbirdə Mərkəzi Elmi Kitabxananın direktoru, tibb üzrə fəlsəfə doktoru Leyla İmanova çıxış edib.

Elektron elmi-intellektual bazanın yaradılmasının “Milli Rəqəmsal Yaddaş” layihəsi çərçivəsində atılan növbəti addım olduğunu qeyd edən L.İmanova  ötən qısa müddət ərzində bu sahədə həyata keçirilmiş önəmli işlərdən danışıb. L.İmanova bildirib ki, Azərbaycanda “Milli Rəqəmsal Yaddaş” layihəsi çərçivəsində elmi tədqiqat işlərinin vahid elektron “Elmi-intellektual baza”sının formalaşdırılması zərurəti olduqca aktualdır.

Bu gün AMEA-nın institutlarında elekron resurslar hər bir müəssisənin öz baza sisteminə uyğun saxlanılır. 

MEK-in təklif etdiyi baza sistemi isə AMEA-da toplanan elektron resursların vahid formatda sistemləşdirilməsinə və mövcud elmi informasiyanın ikitərəfli şəkildə asan mübadiləsinə imkan verir.

L.İmanova MEK-in proqramçılar və layihəçilər qrupu tərəfindən kitabxana işi üzrə təhlillər aparılaraq bu sahədə fəaliyyətin daha da asanlaşdırılmasını təmin etmək məqsədilə hazırlanan proqramlardan da danışıb.

Daha sonra MEK-in Fondların formalaşdırılması bölməsinin rəhbəri Şərafət İsmayılova və Milli Rəqəmsal Yaddaş şöbəsinin əməkdaşı Əzizağa Haxverdiyev təqdimatla çıxış ediblər.

Çıxışlarda MEK-in bu günə qədər yüzdən artıq xarici ölkə universitetləri və dünyanın tanınmış elmi bazaları ilə əlaqələrinin qurulduğu bildirilib.

Həmçinin kitabxananın çap və elektron resursları haqqında, eləcə də MEK-in informasiya bazasının formalaşdırılması istiqamətində gördüyü işlər barədə məlumat verilib. Bundan başqa Vikilayihə-lərdə fəaliyyət, qeydiyyatdan keçmə, məqalələrin yaradılması, kitabxana resurslarının qorunması və saxlanılması, impakt faktorlu jurnallarda məqalələrin yerləşdirilməsi və digər bu kimi çoxçeşidli praktiki mövzularda keçirilən təlimlərdən danışılıb.

Konfransda AMEA-da hazırlanan elmi məhsulların ikitərəfli və çoxtərəfli formatlarda müntəzəm mübadiləsi, müasir standartların tətbiqi ilə kataloqlaşdırılması, müxtəlif bazalarda yerləşdirilməsi və digər məsələlər ətrafında müzakirələr aparılıb.

Tədbirdə Milli Rəqəmsal Yaddaş bazasının fəaliyyətinin daha da təkmilləşdirilməsi və kitabxanada vahid elektron idarəedilmə sisteminin qurulması tələbini nəzərə alaraq bir sıra təkliflər səsləndirilib.

Təkliflərdə AMEA-nın Mərkəzi Elmi Kitabxanasında istifadə olunan “Vahid elekron qeydiyyat sistemi”nin AMEA elmi müəssisə və təşkilatlarının kitabxanalarına da tətbiq edilməsi, elmi məqalə və kitabların elektron formatda MEK-ə təqdim olunmasını təmin etmək və digər bu kimi məsələlər öz əksini tapır.

Günel