TƏDBİRLƏR

Azərbaycan Təhsil Nazirliyi bu il 10-cu sinif şagirdləri üçün nəzərdə tutulmuş “İnformatika” dərsliyinə kibercinayətkarlığa həsr olunmuş bir dərs daxil edilib.

Təhsil Nazirliyinin şöbə müdiri İsmayıl Sadıxovun “APA-ECONOMICS”ə verdiyi məlumata görə, bu dərsdə piratçılıq, hakerlik və kibercinayətkarlığın digər növləri haqda ətraflı məlumatlar təqdim edilib. Bununla yanaşı, bu ilin sonuna kimi bütün Bakı məktəblərinin Təhsil Nazirliyinin nəzdində yaradılmış data-mərkəzinə qoşulacağı gözlənilir.

Qeyd edək ki, məktəblər üçün mərkəzləşdirilmiş internet şəbəkəsinin data mərkəzinin yaradılması Azərbaycanda məktəblərin informasiyalaşdırması üzrə II Dövlət Proqramı çərçivəsində baş tutub. Hazırda bir sıra məktəb bu şəbəkəyə qoşulub, ilkin mərhələdə Bakı və Sumqayıtda yerləşən 400 məktəb yeni data mərkəzi üzərindən internetə çıxışla təmin ediləcək. Ümumilikdə isə 2012-ci ilədək ölkənin bütün məktəblərin bu şəbəkəyə qoşulacağı gözlənilir.

İ.Sadıxovun sözlərinə görə, bu prosesə paralel olaraq məktəblərin istifadə etdikləri internet şəbəkəsində arzuolunmaz internet kontentinə çıxışı məhdudlaşdırmaq məqsədilə Filtrasiya Şurası bu cür saytların siyahısını tutub və məktəb kompüterlərindən bu saytlara çıxış filtrasiya sistemi vasitəsilə bloklaşdırılacaq.