“Startap Günləri”nin ikinci günü qaliblər müəyyənləşib

Azərbaycan Texniki Universitetinin (AzTU) İnkubasiya Mərkəzində AzTU, Bakı Dövlət Universiteti (BDU) və Azərbaycan Memarlıq və İnşaat Universiteti (AzMİU) tələbələrinin iştirakı ilə keçirilən “Startap Günləri”nin ikinci günü intensiv fəaliyyət və layihə təqdimatları ilə davam edib.

Xeberler.az bildirir ki, tədbirin ikinci günündə əvvəlki mərhələdə seçilmiş 7 komanda ekspert və mentorların dəstəyi ilə layihələri üzərində işləyib. Gün ərzində iştirakçılar startap ideyalarının inkişaf etdirilməsi, prototiplərin hazırlanması və yekun təqdimat mərhələsinə hazırlıq istiqamətində fəaliyyət göstəriblər.

Komandalara prototip hazırlığı, komanda işi, təqdimat strukturunun qurulması və münsiflər qarşısında çıxış zamanı diqqət edilməli əsas məqamlarla bağlı ətraflı məlumat verilib. Günün ilk yarısı layihələrin inkişafına, ikinci yarısı isə təqdimatların hazırlanmasına həsr olunub. Eyni zamanda püşkatma yolu ilə komandaların çıxış sıralaması müəyyən edilib.

Daha sonra komandalar hazırladıqları layihələri münsiflər heyəti qarşısında 5 dəqiqəlik təqdimatlar şəklində nümayiş etdiriblər. Təqdimatlar münsiflər — Fərid Kazımov, Orxan Əhmədov və Aysel Sadıqova tərəfindən innovativlik, aktuallıq, texniki əsaslandırma, komanda işi və reallaşdırma potensialı meyarları üzrə qiymətləndirilib.

Qiymətləndirmənin nəticələrinə əsasən:

1-ci yer — “Quadra” komandası (BDU tələbələri)

2-ci yer — “MentorMind” komandası (AzTU tələbələri)

3-cü yer — “Revu” komandası (AzTU tələbələri)

Tədbirin sonunda yekun təqdimat və mükafatlandırma mərasimi keçirilib. Qalib komandaların üzvlərinə müxtəlif qiymətli hədiyyələr, diplomlar və sertifikatlar AzTU rəhbərliyi, Azərbaycan İnternet Forumunun prezidenti, AzTU İnkubasiya Mərkəzinin koordinatoru və mentorlar tərəfindən təqdim olunub.

Bu il “Startap Günləri”nin fərqləndirici məqamlarından biri də öz layihəsini ən fəal və inamlı şəkildə müdafiə edən iştirakçının ayrıca mükafatlandırılması olub. AzTU-nun İnformasiya texnologiyaları və telekommunikasiya fakültəsinin I kurs tələbəsi, “SpotOn” komandasının üzvü Səkinə Bədirova uğurlu təqdimatına görə xüsusi mükafata layiq görülüb.

Qeyd edək ki, “Startap Günləri”nin əsas məqsədi ölkədə startap ekosisteminin inkişafına dəstək vermək, gənclərin innovativ düşüncə və sahibkarlıq bacarıqlarını inkişaf etdirmək, onların yeni layihələr formalaşdırmasına və real biznes mühitinə inteqrasiyasına şərait yaratmaqdır.