İNNOVASİYA VƏ STARTAP

Azərbaycan Texniki Universitetinin İnkubasiya Mərkəzində keçirilən Startap Günlərinin ikinci günü 22 noyabr tarixində intensiv və məhsuldar fəaliyyətlə davam edib. Səhər saatlarından etibarən əvvəlki gün seçilmiş 6 komanda ekspert və mentorların dəstəyi ilə layihələri üzərində işləməyə başlayıblar.

Xeberler.az məlumat verir ki, bu mərhələdə mentorlar Orxan Əhmədov, Rəşad Əliyev, Fərid Kazımov, Aysel Sadıqova və Günel Məmmədli komandaların yanında olaraq onlara layihə hazırlanması prosesində məsləhətlər verib, düzgün istiqamət seçilməsində yaxından köməklik göstəriblər. Komandalar prototipin formalaşdırılması, komanda işi, təqdimatın strukturu və münsiflər qarşısında çıxış zamanı diqqət edilməli vacib nüanslar barədə ətraflı məlumatlandırılıblar.

Günün birinci yarısı layihələrin inkişafına, ikinci yarısı isə təqdimatların hazırlanmasına həsr olunub. Komandalar ekspertlərin rəylərini nəzərə alaraq layihələrinin təqdimat forması üzərində işləyib və çıxışlarını təkmilləşdiriblər.

Günün sonunda komandalar hazırladıqları layihələri münsiflər heyəti qarşısında 4–5 dəqiqəlik təqdimatlar şəklində nümayiş etdiriblər. Təqdimatlar zamanı layihələrin innovativliyi, aktuallığı, texniki əsaslandırılması, komanda işi və reallaşdırma potensialı dəyərləndirilib.

Münsiflər heyətində Orxan Əhmədov, Rəşad Əliyev, Fərid Kazımov, Günel Məmmədli və Aysel Sadıqova yer alıblar. Qiymətləndirmə nəticələrinə əsasən, 6 komanda arasından qaliblər müəyyən olunub:

1-ci yer – “Lingo AI”
2-ci yer – “Cyber Defence with AI”
3-cü yer – “Bridge to Abroad”

Tədbirin sonunda Startap Günlərinin yekun təqdimat mərasimi keçirilib. Qalib komandaların üzvlərinə diplomlar və sertifikatlar Azərbaycan Texniki Universitetinin rəhbərliyi, Azərbaycan İnternet Forumunun prezidenti, AzTU İnkubasiya Mərkəzinin koordinatoru və mentorlar tərəfindən təqdim olunub.

Startap Günləri ölkədə milli startap infrastrukturunun gücləndirilməsi, gənclərin innovativ layihələrə yönləndirilməsi, yeni startapların formalaşmasına dəstək göstərilməsi və startap ekosistemi daxilində əməkdaşlıqların artırılmasına xidmət edən mühüm tədbirlərdən biridir.