İNNOVASİYA VƏ STARTAP

Azərbaycan Texniki Universitetinin İnkubasiya Mərkəzində keçirilən Startap Günlərinin ikinci günü — 6 dekabr tarixində — intensiv və məhsuldar fəaliyyətlə davam edib. Səhər saatlarından etibarən əvvəlki gün seçilmiş 8 komanda ekspert və mentorların dəstəyi ilə layihələri üzərində işləməyə başlayıblar.

Xeberler.az bildirir ki, bu mərhələdə mentorlar Orxan Əhmədov, Bəhruz Mustafayev, Azər Bayramov, Rasim Abdullayev və Rəşad Əliyev komandaların yanında olaraq layihələrin hazırlanması prosesində onlara məsləhətlər verib, düzgün istiqamətin seçilməsində yaxından dəstək olublar. Komandalara prototipin formalaşdırılması, komanda işi, təqdimatın strukturu və münsiflər qarşısında çıxış zamanı nəzərə alınmalı vacib məqamlarla bağlı ətraflı izahlar təqdim edilib.

Günün birinci yarısı layihələrin inkişafına, ikinci yarısı isə təqdimatların hazırlanmasına həsr olunub. Komandalar mentorların rəyləri əsasında layihələrinin təqdimat formatını təkmilləşdirib və çıxışlarını daha da dəqiqləşdiriblər.

Günün sonunda komandalar hazırladıqları layihələri münsiflər heyəti qarşısında 4–5 dəqiqəlik təqdimatlar şəklində nümayiş etdiriblər. Təqdimatlar zamanı layihələrin innovativliyi, aktuallığı, texniki əsaslandırılması, komanda işi və reallaşdırma potensialı qiymətləndirilib.

Münsiflər heyətində Orxan Əhmədov, Bəhruz Mustafayev, Azər Bayramov, Rasim Abdullayev və Rəşad Əliyev yer alıblar. Qiymətləndirmə nəticələrinə əsasən, 8 komanda arasından qaliblər müəyyən olunub:

1-ci yer – “Tibb-X”
2-ci yer – “Safe Her”
3-cü yer – “Work Finder”

Tədbirin sonunda Startap Günlərinin yekun təqdimat mərasimi keçirilib. Qalib komandaların üzvlərinə diplomlar və sertifikatlar Azərbaycan Texniki Universitetinin rəhbərliyi, Azərbaycan İnternet Forumunun prezidenti, AzTU İnkubasiya Mərkəzinin koordinatoru və mentorlar tərəfindən təqdim olunub.

Qeyd edək ki, Startap Günləri ölkədə milli startap infrastrukturunun gücləndirilməsi, gənclərin innovativ layihələrə yönləndirilməsi, yeni startapların formalaşmasına dəstək göstərilməsi və ekosistem daxilində əməkdaşlıqların artırılmasına xidmət edən mühüm təşəbbüslərdən biridir.