TƏDBİRLƏR

Dünyanın ən böyük aviasiya, kosmos və texnologiya festivalı olan “TEKNOFEST” texnologiya müsabiqəsi 2025-ci ildə Şimali Kipr Türk Cümhuriyyətində texnologiya və innovasiyaya həvəsli iştirakçıları bir araya gətirir.

Xeberler.az məlumat verir ki, 2025-ci ildə ilk dəfə keçiriləcək və “TEKNOFEST Robolig” Mavi Vətən Müsabiqəsi, “TEKNOFEST” KKTC Araşdırma Layihə Müsabiqəsi və “HackMasters” Mavi Vətən Müsabiqəsi ilə texnologiya və innovasiya dünyasında böyük həyəcan yaradacaq festival üçün müsabiqə müraciətləri başlayıb.

İştirakçılar layihələrini nümayiş və inkişaf etdirmək imkanı əldə edəcək, komandalar isə ümumilikdə 2,5 milyon TL (türk lirəsi) mükafat və 3 milyon TL (türk lirəsi) maliyyə dəstəyi ilə təmin olunacaqlar.

“TEKNOFEST 2025” çərçivəsində keçiriləcək müsabiqələr texnologiyanın müxtəlif sahələrində innovativ həllərin hazırlanması imkanı təqdim edir. Turizm Texnologiyaları Yarışması Türkiyə və Şimali Kipr Türk Cümhuriyyətinin zəngin mədəni irsi, turizm potensialı və mədəni fəaliyyətləri üçün innovativ həllər hazırlamaqla Sosial İnnovasiya Müsabiqəsi sosial problemlərə texnologiyayönümlü yaradıcı yanaşmalar təqdim edəcək.

İlk dəfə təşkil ediləcək müsabiqələrdən biri olan “TEKNOFEST” KKTC Araşdırma Layihə Müsabiqəsində “Kənd təsərrüfatı, Ətraf mühit və enerji” kateqoriyalarında Şimali Kipr Türk Cümhuriyyətinin problemlərinə yenilikçi həllər tapılacaq. Uçan Avtomobil Simulyasiya Müsabiqəsi simulyasiya mühitində komandaların avtonom uçuşunu, strateji nəzarəti və yenilikçi hava nəqliyyatı həllərini inkişaf etdirməyi hədəflərkən, “TEKNOFEST” Dron Çempionatı KKTC mərhələsi aviasiya həvəskarlarını unikal bir təcrübəyə dəvət edəcək.

“TEKNOFEST Robolig” Mavi Vətən Müsabiqəsi komandalara robototexnika və kodlaşdırma bacarıqlarını inkişaf etdirmək imkanı verməklə “HackMasters” Mavi Vətən Müsabiqəsi öz qapılarını kibertəhlükəsizlik sahəsində istedadlarını nümayiş etdirmək istəyənlərin üzünə açacaq.

Dünyanın hər yerindən iştirakçıları qəbul edəcək “TEKNOFEST” KKTC Texnologiya Müsabiqəsinə son müraciət tarixi yanvarın 15-dir. İştirakı ödənişsiz olan tədbirlə bağlı ətraflı məlumat və müraciət üçün www.teknofest.org saytına daxil ola bilərsiniz.