QOĞAL HAQQINDA BİR NAĞIL

Çox danışanın qabağında şey eləməsən deyəcək ki zadın yoxdur
Azərbaycan atasözü

Düz 1 həftə bundan əvvəl yeni “bərk gedən” İnternet layihələrimizdən birinin icraçı direktorunun analitik yazısına bir cavab məqaləsi yazmışdım. Layihələrini sivil yolla PR etmələri bəs deyilmiş, qara PR-a yönəlib, bütün digər milli layihələri bəyənməmək, ilişmək, söz atmaq kimi xoşagəlməz yola baş vurmuşdular.

Atılan daşlardan biri də Azərbaycan İnternet Forumuna atılmış lazımsızlığı və mənasızlığı haqqında atılan iddia idi. Həmin yazıda yazılanların hamısının altında bir mənanın olduğu aşkar şəkildə bilinirdi. Bir tək AİF-in “fındıqqabıqlığı”-nın səbəbi müəmmalı və üstü örtülü qalmışdı.

Hər bir mücrünün ağzı bir gün açıldığı kimi, 1 həftə əvvəl yazılan içi zəhər dolu yazının mənası da lap indicə aydın oldu. Bu gün həmin “bərk gedən” layihənin qardaş layihəsi olan informasiya saytında bir xəbər nəşr olunmuşdur. Xəbərin yarısı “bərk gedən” layihənin təriflənməsinə həsr olunub. Yerdə qalan yarısında isə həmin “bərk gedən” layihənin təşkilatçılıq eləmək istədiyi bir tədbirdən bəhs edilir. Təbii ki, bu ancaq bir təsadüfdür ki, tədbir, ölkədə keçiriləcək İlk İnternet Forum olaraq adlanır.

Fikir gözəldir, ancaq bir neçə sual doğurur:

• Bu cür tədbirin təşkilatçılığını heç 1 ilini belə tamamlanmamış, gördüyü işlərlə yox, mənasız və yersiz (artıq qara da) PR-ı ilə tanınan bir layihənin etməyə haqqı varmı?
• “Forum” sözünün əvəzinə “konfrans”, “seminar”, “dəyirmi masa” v.s. kimi sözlər istifadə oluna bilməzdi? Təşkilatçıların fantaziyaları ancaq bura kimi çatıb?
• Sırf belə bir tədbir keçirmək niyyətləri varsa, 9 ildir ki fəaliyyət göstərən, ölkənin İnternet sahəsində ən qabaqcıl müəssisələrin nümayəndələrinin üzv olduqları və icraatları ilə geniş tanınan Azərbaycan İnternet Forumuna söz atmaq şərt idi ?

Təbii ki, Google-a belə söz atmağa “ərki çatan” (necə olsa cavab verən deyillər) layihə rəhbəri, asanlıqla Azərbaycandakı hamını da rahatlıqla palçığa batırıb çıxarda bilər. Ancaq bundan sonra təşkil elədiyi tədbirdə kimlərin iştirak etdiyi çox maraqlı olacaq.

Pul mükafatına görə bloqlarda yazan səviyyəsi “cıran” bloqqerlər, mənasız realiti şou-larında iştirak edən super-iddialı qızlar, 100 manatlıq uduş üçün azərbaycanca ən çox axtarılan sozü tapan münəccimlər?

Tədbirin elanına həsr olunmuş xəbərin yarısından artığını öz reklamlarına həsr edən bir layihənin təşkil etdiyi forum öz layihələrinin təqdimat mərasiminə çevrilməsin?

PR-ını, istifadəçilərini, tədbirlərini, məşhurluğunu mənbəyi bilinməyən pulun mövcudluğu üzərində quran bir layihə özünə bir az artıq güvənmirmi?

İndicə bu yazımı yazanda saytlarına daxil olmaq istəyəndə saytın açılmadığını, gördüm, “Aparılan profilaktik işlər və sistem təkmilləşdirilməsi ilə əlaqədar olaraq sayt bir müddət işləməyəcək. Müvəqqəti narahatlığa görə üzr istəyirik.” yazısı ilə qarşılaşdım. Ürəyim ağrıdı. Day bir sözüm yoxdur.