RƏQƏMSAL DÜNYA

Virtual jüri üzvü olmağıma baxmayaraq, e-mail vasitəsi ilə da olsa mərasimə dəvət almamışam və beləliklə iştirak etməmişəm. Fəqət dəyərli vaxtımı sərf edib, jüri üzvü olaraq çətinliklərlə qeydiyyatdan keçməyimə və hər bir kateqoriyada saytları bir-bir incələyib, layiqlərinə səs verməyimə görə, nəticədə hansı layihələrin birinciliyi qazanmağı mənim üçün maraqlı idi. Bu gün nə qədər çalışsam da Netty.az saytının azərbaycanca versiyasında nəticələr barədə bir xəbər yada press-reliz tapa bilmədim. Rusca versiyasına da baxmaq ağlıma gələndə, orda nəticələrin elan olduğunu gördüm. Aynaya baxdım və...

Dövlət saytları kateqoriyasında AR Mədəniyyət və Turizm Nazirliyinin saytına (www.mct.gov.az) birinciliyin verildiyini gördüm. Whois.az saytında domenin kimin adına qeydiyyatda olduğunu öyrənmək üçün yoxlayanda, sahibinin adının olmadığını yada gizlədildiyini gördüm.

Bir az da cəsarət toplayıb sayta daxil oldum. Saytın dizaynında Azərbaycan mədəniyyəti (ədəbiyyat, musiqi, xalçacılıq, rəssamlıq, miniatür v.s.) naminə heç bir şey görə bilmədim, solda təvazökar şəkildə dayanmış bayraq və gerbimizə tərəf novostroyka, neft daşları, dənizdən Bakının mənzərəsi kimi köhnə və keyfiyyətsiz balaca şəkillər axıb gedirdi. Menyunun arxa fonunda istifadə olunmuş və gözləri yoran naxışların azərbaycan milli naxışları ilə heç bir oxşarlığını tapa bilmədim.

Xalçacılıqnan əlaqədar hər hansı bir məlumat axtarmaq istədim, ümumiyyətlə Azərbaycanda elə bir sənətin olduğu barədə bir izə rastlaşmadım, azərbaycan musiqi alətləri barədə də heç bir informasiya verilməmişdi. Maraqsız yazılar, boş bölmələr.. Mədəniyyət saytında yerləşdirilmiş məlumatlarda nə mədəniyyət bölməsində, nə tarix bölməsində, nə turizm bölməsində, nə də ki şəxsiyyətlər bölməsində olan məqalələrdə bir dənə də şəkil yoxdu, ancaq nazirin, nazir müavinlərin şəkillərini görə bildim, bir də turizm xadimləri(!?) bölməsindəki şəxslərin şəkilləri mövcud idi.  Ürəyim ağrıdı, mükafat alan mədəniyyət saytımızdan ayrıldım.

Qayıtdım Netty-yə. Ən yaxşı dizayn üzrə xüsusi kateqoriyasında birincilik əldə edən Rusiyadakı azərbaycanlılar (www.azeri.ru) saytı diqqətini cəlb etdi. Daxil oldum. Sadə, heç bir xüsusiyyəti və yadda qalan elementi olmayan saytın nəyə görə dizayna görə mükafat aldığını özüm-özümə fikirləşdim, cavab tapa bilmədim. Rus mütəxəssisləri tərəfindən hazırlanmış və ancaq rusca olan saytı oxumağa marağım olmadı. Fəqət saytın aşağısında yerləşdirilmiş bir banner diqqətimi cəlb etdi. Üstünə vurdum, yeni sayta keçdim.

“Azərbaycanın 7 möcüzəsi” adlı bir layihənin saytıydı. 2 dildə www.7chudes-az.ru və www.7wonders-az.ru ünvanlarında fəaliyyət göstərməsi gərəkirdi, ancaq ingiliscə olan ikinci ünvanda heç nə açılmadı. Fikir original idı: Azərbaycanda yer alan tarixi abidələrin içərisindən səsvermə üsulu ilə möcüzə sayılacaq obyektlər seçilməli idi. Namizəd olaraq göstərilmiş obyektlərin seçimi maraqlı idi. Azərbaycandakı bir çox əhəmiyyətli və həqiqətən də möcüzəvi tarixi obyekt yox ikən,  Ermənistandakı çoxdan sökülmüş və haqqında heç bir məlumatı olmayan Sərdar sarayı xəritədə göstərilmişdir. Xəritəyə diqqətlə baxanda da obyektlərin yerlərinin o dərəcədə səhv yerləşdirildiyini gördüm ki, Qobustan qoruğundakı qayaüstü şəkillər Qobustan rayonundakı Mərəzəyə yerləşdirilmişdir. Təşkilatçıların coğrafiyada elementar bisavadlıqları üzə çıxdı. Təşkilatçıların kim olduğunu maraqlandım. Saytda Təşkilatçılar bölməsində iki qurumun adı yazılmışdı: Azərbaycan Respublikası Mədəniyyət və Turizm Nazirliyi və İRS – Beylənxalq Azərbaycan jurnalı.

İçimdən keçdi ki, bu qurumlara əlaqə saxlayım ki, xəritədəki səhvləri düzəltsinlər. Nə İRS jurnalının saytında nə Mədəniyyət və Turizm Nazirliyimizin saytında heç bir telefon nömrəsinə yada email ünvanını əlaqələr bölməsində tapa bilmədim. Sözlərim içimdə qaldı.

Mədəniyyətimizə və irsimizə sahib çıxmağımızın səviyyəsini müşahidə etməyə imkan verən Netty-yə dərin təşəkkürlərimi bildirirəm.