TƏDBİRLƏR

Orta Asiya və Güney Qafqaz Söz Azadlığı Şəbəkəsi (CASCFEN) Tərtərdə “Müəllimlər üçün onlayn ifadə azadlığı mədəniyyəti” mövzusunda növbəti seminarını keçirib.

CASCFEN-dən Xeberler.az-a verilən məlumata görə,  Azərbaycan Respublikası Prezidentinin yanında Qeyri-Hökumət Təşkilatlarına Dövlət Dəstəyi Şurasının maliyyələşdirdiyi və Tərtər rayon təhsil şöbəsində baş tutmuş seminarda 26 müəllim iştirak edib.

Seminarın açılışında çıxış edən Tərtər rayon təhsil şöbəsinin metodisti İntiqam Nuruyev bölgədə bu cür tədbirin keçirilməsini alqışladıqlarını deyib.

Sonra CASCFEN sədri Azər Həsrət çıxış edərək Tərtərdə gördüyü abadlığı, rayondakı dəyişiklikləri yüksək qiymətləndirib. Daha öncə də Tərtərdə bənzər tədbirlər təşkil etdiklərini deyən CASCFEN sədri qeyd edib ki, hər dəfə rayona gələndə buranın daha da gözəlləşdiyinin şahidi olur.

Seminarın eksperti, Jurnalist Araşdırmaları Mərkəzinin rəhbəri Seymur Verdizadə ifadə azadlığı mədəniyyətilə bağlı şəxsi təcrübəsindən danışıb, ayrı-ayrı örnəklərlə iştirakçıları maraqlandıran məsələləri izah edib. O qeyd edib ki, hər kəs ifadə azadlığına can atdığı halda həm də məsuliyyətini unutmamalıdır.

Digər ekspert, CASCFEN sədri Azər Həsrət isə iştirakçılara ifadə azadlığının qanunverici bazası, beynəlxalq normalar haqqında danışıb. Sonda o, netiketin 10 qızıl qaydası haqda məlumat verib, iştirakçıların suallarını cavablandırıb.

Anonim sorğu zamanı iştirakçılardan 20-si seminarı əla, 6-sı isə yaxşı qiymətləndirib.

Sonda sertifikatlar təqdim edilib, qrup şəkli çəkdirilib.

Xeberler.az