TEXNOLOGİYA

İki müəllif “Apple” şirkətinə qarşı iddia qaldıraraq onu onların razılığı olmadan AI modelini öyrətmək üçün kitablarından istifadə etməkdə və beləliklə, müəllif hüquqlarını pozmaqda ittiham ediblər. İddiaçılar Qredi Hendriks və Cennifer Robertson iddia edirlər ki, “Apple” süni intellekti öyrətmək üçün onların əsərləri də daxil olmaqla müəllif hüquqları ilə qorunan pirat kitablar toplusundan istifadə edib. Onlar öz şikayətlərində “Applebot” adlı axtarış motorunun lisenziyasız müəllif hüquqları ilə qorunan kitablar, o cümlədən öz kitablarından ibarət “kölgə kitabxanaları” yarada biləcəyini bildiriblər.

Xeberler.az xarici mətbuata istinadən məlumat verir ki, hazırda “kölgə kitabxanaları”nda çoxlu sayda kitab və müəllif aşkar edilməsi səbəbindən sözügedən iddiaya kollektiv şikayət kimi baxılır.

İddia ərizəsində deyilir: “Bu davranış iddiaçıları və onların qrupunu öz işləri üzərində nəzarətdən məhrum edib, məhsullarının iqtisadi dəyərini sarsıdıb və “Apple” şirkətinə qeyri-qanuni yollarla böyük kommersiya uğurları əldə etməyə imkan verib”.

Bu, generativ süni intellekt texnologiyasını inkişaf etdirən şirkətlərə qarşı açılan çoxsaylı məhkəmə iddialarından yalnız biridir. “OpenAI” şirkəti “The New York Times” və ABŞ-dakı ən qədim qeyri-kommersiya redaksiyası da daxil olmaqla bir neçə şikayətçi tərəfindən məhkəmə iddiası ilə üzləşir. Qeyd edək ki, “Claude” çatbotunun arxasında duran “Anthropic” şirkəti bu yaxınlarda müəlliflər tərəfindən, habelə qrup halında qaldırılan pirat iddialarını həll etmək üçün 1,5 milyard dollar ödəməyə razılaşıb. Eyni zamanda, yazıçılar da şirkəti AI texnologiyasını öyrətmək üçün onlayn kitabxanaların pirat kitablarından istifadə etməkdə günahlandırıblar. Prosesdə iştirak edən 500 000 müəllifin hər bir iş üçün 3 000 dollar alacağı bildirilir.