İNNOVASİYA VƏ STARTAP

İqtisadi İslahatların Təhlili və Kommunikasiya Mərkəzinin (İİTKM) operatoru olduğu “Enterprise Azerbaijan” portalının ABŞ-ın Nevada Universiteti Özmen Sahibkarlıq Mərkəzi ilə birgə həyata keçirdiyi “Startup School 3” layihəsi çərçivəsində “Yaşıl və Rəqəmsal İpək Yolu” (Green and Digital Silk Road) beynəlxalq akselerasiya proqramında onlayn təlimlərə start verilib.

Xeberler.az bildirir ki, təlimlərin ilk günündə İİTKM-nin icraçı direktoru, Prof. Dr. Vüsal Qasımlı açılış nitqi ilə çıxış edib. O, dövrümüzdə və gələcəkdə yaşıl və rəqəmsal texnologiyaların iqtisadiyyatda əhəmiyyətindən danışaraq, bu sahələrdə artan investisiya imkanlarını vurğulayıb. Prof. V. Qasımlı “Startup School 3” platformasının təşəbbüskarlar və innovatorlar üçün dəstəkləyici yanaşmalarını qeyd edərək, “Yaşıl və Rəqəmsal İpək Yolu” beynəlxalq akselerasiya proqramından böyük gözləntiləri olduğunu bildirib.

İlk təlim “Yaşıl iqtisadiyyat və təsirli startap təlimi” (Green economy and impact startup training) mövzusunda, Maltada fəaliyyət göstərən “A8” Akselrasiya Mərkəzinin Layihələr rəhbəri Gonca Kara tərəfindən təqdim olunub. Azərbaycan, Türkiyə, Pakistan, Qırğızıstan, Gürcüstan və Cənubi Koreyadan qatılan 126 startap komandasının iştirak etdiyi təlimlər 2 ay ərzində davam edəcək.

Qeyd edək ki, “Startup School 3” layihəsinin ABŞ-ın Nevada Universiteti Özmen Sahibkarlıq Mərkəzi, Almaniyanın Süni İntellekt Araşdırma Mərkəzi, Türkiyənin OSTİM Texniki Universiteti də olmaqla, Çin, Pakistan, Qazaxıstan, Rusiya, Estoniya, Özbəkistan və digər ölkələrdən 20-dən artıq beynəlxalq tərəfdaşı var. Layihəyə İnnovasiya və Rəqəmsal İnkişaf Agentliyi, Kiçik və Orta Biznesin İnkişafı Agentliyi, İqtisadi Zonaların İnkişafı Agentliyi, Əqli Mülkiyyət Agentliyi, Dövlət Məşğulluq Agentliyi, Bərpa Olunan Enerji Mənbələri Dövlət Agentliyi, Elm və Təhsil Nazirliyinin Yüksək Texnologiyalar Parkı ilə birlikdə 30-a yaxın yerli qurum tərəfdaşlıq edir.

“Yaşıl və Rəqəmsal İpək Yolu” beynəlxalq akselerasiya proqramının əsas məqsədi yaşıl enerji və rəqəmsallaşma sahələrində fəaliyyət göstərən startapları bir araya gətirmək və bu istiqamətlərdə innovativ ideyaların inkişafını dəstəkləməkdir.