TEXNOLOGİYA

Bir müddət öncə alternativ enerji haqqında ətraflı məlumatı Azərbaycanın vətəndaş cəmiyyətinə çatdırmağa stimul vermək üçün “Alternativ gələcəklə əlaqə'' layihəsi həyata keçirildi.

Layihənin əsas məqsədi də Azərbaycan gəncliyinin davamlı inkişaf etməsi üçün təcrübə və potensial gələcəyin öyrənilməsi, kütləvi informasiya vasitələrində davamlı olaraq göstərilən istiqamətlərdə məqalələrin, tədqiqat yazılarının dərc olunmasına kömək göstərmək olub.

Xeberler.az olaraq layihə və gələcək istiqamətlər barədə “Alternativ gələcəklə əlaqə'' layihəsinin rəhbəri Məhbubə Musayeva ilə söhbət etdik.

Layihənin yaranmsı barədə məlumat verən Məhbubə xanım deyib ki, Qobustan səfəri zamanı yol kənarında olan günəş panelləri onun diqqətini çəkib və bunla bağlı aradşdırma aparmağa başlayıb:

“Bildiyimiz kimi, ənənəvi enerji formaları, əsasən də neftdən alınan enerji qlobal istiləşməyə rəvac verir və eyni zamanda, bunlar tükənən enerji mənbələri olduğuna görə bir gün tamamilə olmayacaq. Bu yaxınlarda həyata keçirdiyimiz “Alternativ Gələcəklə Əlaqə” layihəsinin məqsədi alternativ biliyə əsaslanan iqtisadiyyata keçid həllərinin müəyyən olunması, mətbuat vasitəsilə alternativ enerji, nanotexnologiyalar haqqında ətraflı məlumatı Azərbaycanın vətəndaş cəmiyyətinə çatdırmağa stimul verməkdir. Həmçinin də Azərbaycan gəncliyinin davamlı inkişaf etməsi üçün təcrübə və potensial gələcəyin öyrənilməsi, Azərbaycan mətbuatında mütəmadi olaraq göstərilən istiqamətlərdə məqalələrin, araşdırma yazıların dərc olunmasından ibarətdir”.

Onun sözlərinə görə, layihə gözlənildiyindən də uğurlu olub:

“Layihə gözlədiyimizdən də maraqlı oldu. Xüsusi olaraq seçdiyimiz norveçli təlimçi Knut Erlend, Mersedes-Benz şirkətində çalışan azərbaycanlı alim Teymur Sadıqov və digər dəyərli təlimçilər maraqlı təqdimatları ilə layihənin uğurlu olmasında böyük rol oynadı. Eyni zamanda Suraxanı Güneş Elektrik stansiyasına baş tutan təlim səfərimiz əldə etdiyimiz biliklərin təkmilləşdirilməsində əhəmiyyətli oldu”.

Bu mövzunun mətbuatda işıqlandırılması məsələsinə gəlincə isə o, qeyd edib ki, bu sahədə informasiya dəstəyi yetərli deyil:

“Bu istiqamətdə işlər görülür, amma mətbuatda ətraflı işıqlandırılmadığı üçün geniş auditoriya toplaya bilmir. Bu da, alternativ enerjinin yeni sahə olması ilə bağlı ola bilər. İnanıram ki, gələcəkdə həyata keçirmək istdədiyimiz layihələr mediada geniş və mütəmadi işıqlandırılacaq. Bununla da daha çox insan məlumat ala biləcək”.

Məhbubə Musayeva layihəyə dəsətək verən qurum və təşkilatların da fəaliyyətini vurğulayıb:

“Layihə Azərbaycan Respublikası Prezidenti yanında Gənclər Fondunun həyata keçirdiyi VIII qrant müsabiqəsi zamanı qalib seçilmişdi. Yəni, fərdi layihədir. Bununla yanaşı, layihədə Ekologiya və Təbii Sərvətlər Nazirliyi, Azərbaycan Respublikası Alternativ və Bərpa olunan Enerji Mənbələri üzrə Dövlət Agentliyi (AREA) və “Multimedia” İnformasiya Sistemləri və Texnologiyaları Mərkəzi tərəfdaş olaraq iştirak ediblər və Bakı Ali Neft Məktəbi (BANM) təşkilati dəstək göstərib. Onların yaxından dəstəyi ilə layihə uğurlu alındı”.

Bu layihənin gələcək davamlılığı və bölgələrdə də həyata keçirilməsinə gəlincə Məhbubə Musayeva deyib ki, hazırda bu istiqamətdə Alternativ və Bərpa Olunan Enerji Mənbələri üzrə Dövlət Agentliyi ilə əməkdaşlıq edirlər:

“Bölgələrdə də bu layihəni davam etdirmək istəyirik. Sevindirici haldır ki, agentlik bu işdə bizə dəstək olmağa hazırdır. Məqsədimiz həm də bu sahədən yazan jurnalistlərin peşəkarlığının artırılmasına dəstək verməkdir.”

Məltəm Talıbzadə