"Adi vətəndaş vençur fonduna yatırım edə bilərmi?
Ötən dəfə Mərkəzi Bankın rəhbəri Taleh Kazımovun ekspertlərlə növbəti görüşündə ən kəskin müzakirə mövzusu bu məsələ oldu.
Mənim qaldırdığım məsələlərdən ən əsası da məhz bununla bağlı olub".
Xeberler.az bildirir ki, bu barədə Azərbaycan İnternet Formunun Prezidenti, ekspert Osman Gündüz məlumat verib.
Ekspert qeyd edib ki, vençur maliyyələşmə ilə bağlı vəziyyət qlobal hesabatlardan da görünür ki, ölkəmizdə ən aşağı səviyyədədir:
"Konkret desək on illərdir ki, bizdə vençur fondlar haqqında qanun qəbul edilə bilmir. Çoxsaylı qurumların çoxsaylı cəhdləri olub, amma hamısı uğursuz olub.
Son zamanlar Mərkəzi Bank bu istiqamətdə konkret addımlar atıb və artıq qanun layihəsinin başa çatmaqda olduğunu bildirib.
Elə ötən görüşdə Taleh müəllim məhz bu məsələ üzərində çox dayandı. Belə anladım ki, bank sektorunun tənzimləyici qurumu adi vətəndaşların bizim vençur fondlara yatırım etməsindən ehtiyatlanır".
Osman Gündüzün sözlərinə görə, Mərkəzi Bank yalnız peşəkar investorların vençur fondlara yatırım etməsinə imkan vermək niyyətindədir:
"Bununla bağlı adı çəkilən görüşdə xeyli diskussiya getdi.
Bizim təklifimiz belə oldu ki, əgər belədirsə, onda fondlar klassifikasiya olunsun və ilkin inkişaf mərhələsi keçirən startaplara yatırım edən, məhdud məbləğlərdə yatırımalr edən fondlara istənilən vətəndaşın sərmayə qoyması məqbul hesab edilsin.
Yəni, Fondların klassifikasiyası aparılsın – peşəkar investorlar üçün ayrıca, adi vətəndaşlar üçün isə məhdudiyyətli və maarifləndirici mexanizmlərlə fondlar yaradılsın.
Hansı ki, bu tip təcrübə qlobalda da yetərincədir.
Bununla da adi vətəndaşlar da ekosistemin bir hissəsinə çevrilə bilər, risklərini anlayaraq kiçik yatırımlarla innovasiyaya töhfə verə bilərlər.
Çünki vençur kapitalı təkcə peşəkar dairələrin deyil, bütün cəmiyyətin maraq göstərdiyi və gələcək qazanc potensialı olan bir sahədir".
Ekspert ümid edir ki, illərdir gecikən bu qanun Mərkəzi Bankın səyləri nəticəsində tezliklə qəbul ediləcək və ekosistemin güclənməsinə təkan verəcək.
