TƏDBİRLƏR

İnformasiya Kommunikasiya Texnologiyaları Agentliyinin Poçt rabitəsi şöbəsinin müdiri Vüqar Səmədov cari ilin 25-26 iyun tarixlərində keçirilmiş Avropa Poçt Tənzimləmə Komitəsinin (CERP) 60-cı plenar iclasında onlayn formatda iştirak edib.

Xeberler.az məlumat verir ki, Vüqar Səmədov çıxışında Azərbaycanın poçt sektoru, sahə üzrə mövcud vəziyyət və Agentliyin bu istiqamətdəki fəaliyyəti barədə ətraflı danışıb. 

Təqdimat zamanı Ümumdünya Poçt İttifaqının dəstəyi ilə həyata keçirilən və Azərbaycanın poçt sektorunun təhlili, eləcə də poçt sahəsinin tənzimlənməsinə dair islahat təşəbbüslərini ehtiva edən layihə haqqında məlumat verilib. 

Sonra iştirakçı ölkələrin nümayəndələrinin sualları cavablandırılıb və fikir mübadiləsi aparılıb.

Qeyd edək ki, CERP-in müvafiq plenar iclasında ölkəmizin təmsil olunması Azərbaycanın poçt sahəsi üzrə beynəlxalq təşkilatlarda tanınması baxımından mühüm əhəmiyyət kəsb edir. Xüsusilə də cari ilin sentyabr ayında Birləşmiş Ərəb Əmirliklərinin Dubay şəhərində keçiriləcək 28-ci Ümumdünya Poçt Konqresi öncəsi beynəlxalq tədbirlərdə fəal iştirak ölkəmizin mövqeyinin gücləndirilməsi baxımından önəmlidir. Bununla yanaşı, Ümumdünya Poçt Konqresinə hazırlıq mərhələsində CERP-in plenar iclası Avropa ölkələrinin mövqelərinin əlaqələndirilməsi və ümumi hazırlığın təşkili baxımından mühüm tədbirlərdən biri hesab olunur.