TƏDBİRLƏR

İnnovasiya və Rəqəmsal İnkişaf Agentliyinin (İRİA) təşəbbüsü və Almaniyanın “Hertie School” Universitetinin tərəfdaşlığı ilə keçirilən “Rəqəmsal akademiya”nın növbəti səfəri Səudiyyə Ərəbistanına baş tutub.

Xeberler.az məlumat verir ki, nümayəndə heyətinin səfər çərçivəsində “Rəqəmsal transformasiya və dövlət sektorunda səmərəlilik” mövzusuna həsr olunmuş sessiyada iştirak edib.

Bu səfərin məqsədi Səudiyyə Ərəbistanının rəqəmsal transformasiya strategiyası, rəqabətqabiliyyətli rəqəmsal ekosistemin inkişafı istiqamətində reallaşdırdığı fəaliyyətlə bağlı təcrübənin öyrənilməsi olub. Görüşlər zamanı Azərbaycanın rəqəmsal inkişaf yanaşması və rəqəmsal həlləri haqqında ətraflı məlumat verilib, həmçinin ölkə təcrübəsinin Səudiyyə Ərəbistanında tətbiqini nəzərdə tutan əməkdaşlıq perspektivləri üzrə danışıqlar aparılıb.

İkigünlük proqram çərçivəsində Səudiyyə Ərəbistanının Rəqəmsal Hökumət İdarəsi (DGA) nəzdində yeni yaradılmış “Innovation Hub” ilə tanışlıq turu baş tutub. Bu ölkənin Data və Süni İntellekt üzrə İdarəsində (SDAIA) tədqiqat və innovasiya təşəbbüsləri, eləcə də tənzimləyici çərçivələr, siyasət və qərarvermə mexanizmləri müzakirə olunub.

Bununla yanaşı, Rabitə, Kosmos və Texnologiyalar Komissiyası (CST) və “KAPSARC”da görüşlər keçirilib. “KAPSARC”da baş tutan görüşdə bu qurumun prezidenti Fahad Alajlan və Azərbaycan Respublikasının Səudiyyə Ərəbistanı Krallığındakı səfiri Şahin Abdullayev də iştirak edib. “KAPSARC”da, həmçinin sahənin ekspertləri və rəhbər şəxslərlə fikir mübadiləsi aparılıb. Müzakirələrdə enerji sektorunda rəqəmsal transformasiya, dövlət şirkətlərində rəqəmsallaşma siyasəti və süni intellektin tətbiqi kimi mövzular ətrafında diskussiyalara geniş yer ayrılıb.

İRİA-nın sədr müavini Şahin Əliyev səfər çərçivəsində hər iki ölkə arasında rəqəmsal təcrübə mübadiləsi məqsədilə nəticəyönümlü müzakirələr aparıldığını bildirib. O, eyni zamanda, Səudiyyə Ərəbistanı tərəfindən Azərbaycanın bir sıra rəqəmsal həllərinə, xüsusən rəqəmsal sənəd dövriyyəsinə maraq göstərildiyini vurğulayıb: “Bu səfərdə səudiyyəli həmkarlarımızla faydalı müzakirələr baş tutdu. Bizim rəqəmsal həllərə, xüsusilə də rəqəmsal sənəd dövriyyəsinə maraq böyükdür. Gələcəkdə əməkdaşlığımızı bu istiqamətdə davam etdirəcəyik ”.

Qeyd edək ki, “Rəqəmsal akademiya”nın strateji sessiyasında və səfərlərdə nazir müavinləri, dövlət qurumları rəhbərlərinin müavinləri və müşavirlər də daxil olmaqla indiyədək 43 dövlət qurumundan 70 nəfər rəhbər kadr iştirak edib. Bu təşəbbüsün davamı olaraq, proqram çərçivəsində bir sıra səfərlər həyata keçirilib. Bu ilin yanvarında rəhbər şəxslərin iştirakı ilə Almaniyaya və aprel ayında Sinqapura müvafiq səfərlər edilib.