Azərbaycan yüksək texnologiyalar sahəsində MDB-nin liderlərindəndir - Rudi Kozak
Azərbaycan informasiya texnologiyalarının insanların həyat fəaliyyətlərinin müxtəlif sahələrindəki tətbiq templəri üzrə MDB məkanının liderlərindən biridir. Bu haqda HP-nin Rusiya və MDB ölkələri üzrə baş direktoru Rudi Kozak bəyan edib.
Onun sözlərinə görə, Azərbaycanın İKT sektoruna yaxından nəzər yetirdikdə dərhal iki əsas inkişaf istiqamətini müəyyən etmək olar – “müxtəlif sahələrin fəaliyyətlərinin təmin edilməsi üçün texnologiyalar” və “yeni iqtisadiyyat”.
R.Kozak hesab edir ki, ölkədə iri İKT layihələri reallaşdırılır, bunların bir neçəsi nəinki milli, hətta region miqyaslıdır. Azərbaycanın dövlət sektorunda, təhsilində, biznesin müxtəlif seqmentlərində informasiya texnologiyalarının sistemli tətbiqi həyata keçirilir. Qeyd edək ki, HP şirkəti bu cür yüksək səviyyəli layihələrin reallaşdırılmasında Azərbaycanın fəal tərəfdaşlarındandır.
R. Kozak informasiya texnologiyalarının təhsil sistemində sistemli şəkildə tətbiq olunmasını da müsbət bir hal kimi qiymətləndirib: “İnformasiya texnologiyaları əsasında yeni tədris platformasının yaradılması ölkənin yüksək texnologiyalar sahəsindəki kadr potensialını daha da artırmağa imkan verəcək”, deyə R. Kozak öz sözünü yekunlaşdırıb.
Mənbə: mincom.gov.az
