E - HÖKUMƏT

2015-ci il iyulun 1-nə Azərbaycanda elektron imza (e-imza) alan hüquqi və fiziki şəxslərin sayı 34,597 min təşkil edir.

Bu barədə Xəbərlər-ə Rabitə və Yüksək Texnologiyalar Nazirliyindən məlumat verilib.

2015-ci il iyunun 30-una 6,137 min hüquqi şəxs, 7,595 min vətəndaş və 20,865 min dövlət orqanları əməkdaşları e-imzaya malikdir.

Nazirliyin məlumatına görə, indiyədək elektron xidmətlərlə bağlı müraciətlərin sayı 12 mln. 771,853 min, müraciət edən vətəndaşların ümumi sayı 2 mln. 77,613 min nəfər təşkil edib.

“Ümumilikdə vətəndaşların portala marağının artması müşahidə olunur, eləcə də təkrar müraciət edənlərin sayı artır. Bu dövr ərzində portala müraciət edənlərin 27,6%-ni yeni istifadəçilər, 72,4%-ni təkrar müraciət edənlər təşkil edib”, - deyə məlumatda qeyd edilir.

2015-ci il iyunun 30-na 245,458 min istifadəçi portaldan istifadə üçün sadələşdirilmiş kod-parol alıb.

İlin iyun ayında müraciətlərin əksəriyyəti Tələbə Qəbulu üzrə Dövlət Komissiyası, Rabitə və Yüksək Texnologiyalar Nazirliyi, Əmək və Əhalinin Sosial Müdafiəsi Nazirliyi, Dövlət Sosial Müdafiə Fondunun təqdim etdiyi xidmətlərdən istifadə ilə bağlı olub.

Xeberler.az