6-9 iyun tarixlərində Qazaxıstanın Astana şəhərində, Nazarbayev Universitetində "IT-Universe" adlı müsabiqənin final mərasimi keçirilib. Ötən ilin oktyabr ayından start götürən müsabiqədə məqsəd informasiya texnologiyaları sahəsində innovativ yeniliklərin və insanların tanınması, yeni kadrların qlobal səviyyədə meydana çıxarılmasıdır.
Bu ilki tədbirdə Azərbaycandan 2 universitet — Azərbaycan Memarlıq və İnşaat Universiteti və Qafqaz Universiteti üzrə 3 iştirakçı finala vəsiqə qazanıb. Ümumi olaraq 60 universitetin və 200-ə yaxın iştirakçının qatıldığı müsabiqədə 4 istiqamət üzrə yarış keçirilirdi. Müsabiqədə Namət Məmmədzadə və Rəşid Əliyevin təsis etdikləri «esaver» layihəsi "ən yaxşı innovativ diplom" istiqaməti üzrə 2-ci yerə layiq görülərək fəxri diplom və gümüş medalla mükafatlandırılıblar.
Müsabiqədə 1-ci və 3-cü yerləri isə müvafiq olaraq Qazaxıstan və Ukrayna təmsilçiləri bölüşüblər.
Qeyd edək ki, eSaver ev kiçik ofis şəraitində avadanlıqla elektrik naqili arasında yerləşdirilməklə, avadanlığın istifadə etdiyi elektrik enerjisinin statistik məlumatlarını toplayır, ağıllı idarəetməni həyata keşirir, internet üzərindən nəzarət və idarəedilməsinə imkan verir. eSaver vasitəsi ilə siz nəinki sərfyyatı, hətta qoşulmuş avadanlıqların söndürülüb-yandırıılmasını belə nəzarət edə bilirsiniz. İnternet əlaqəniz olmadıqda, avadanlıq satistik məlumatı öz yaddaşına həkk etmək imkanına da malikdir. Avadanlıq, həmçinin, «ağıllı mikro proqram» vasitəsi ilə istifadə edilən elektrik enerjisinə qənaət etməyə köməklik göstərir.
