Azercell-dən “innovasiya”: "AYLIQ" adı ilə 28 GÜNLÜK internet təklif edir
"Azercell mobil internet tariflərini də dəyişəcəyini elan edib. Təkliflərinə baxıram və qonşu ölkələrlə müqayisə edirəm, yetərincə bahadır və bu, başqa bir müzakirə mövzusudur".
Xeberler.az bildirir ki, bu sözləri Azərbaycan İnternet Formunun Prezidenti, ekspert Osman Gündüz deyib.
Ekspert qeyd edib ki, bu dövlət şirkətinin təqdim etdiyi internet paketləri “aylıq” adı ilə satılır, amma əslində bu paketlər 30 gün yox, cəmi 28 gün keçərlidir:
"Bu, Azercell tərəfindən təklif edilən yeni “innovasiyadır”. Əvvəllər belə hal müşahidə etməmişik.
Adi hesablama göstərir ki, bu qayda ilə müştəri ildə 12 dəfə yox, 13 dəfə ödəniş etməyə məcbur edilir. Yəni ildə 12 yox, 13 “aylıq” internet paketi alınmış olur.
Bu isə az da olsa hər istifadəçidən əlavə qazanc əldə etmək deməkdir. Kiçik görünən bu rəqəm milyonlarla istifadəçidən toplananda şirkət üçün milyonlarla əlavə gəlir deməkdir".
Osman Gündüzün sözlərinə görə, Azercell bu təcrübəni turistlər üçün nəzərdə tutulan Avropa ölkələrindəki 28 günlük SIM kart təcrübəsi ilə eyniləşdirə bilməz. Çünki orada bu sistem yalnız qısa müddətli istifadə – yəni turistlər üçün nəzərdə tutulur:
"Bizdə isə bu “28 gün” yerli əhali üçün “aylıq” adı altında tətbiq olunur. Azercell-də kimsə deyə bilər ki, biz xırda işlərə baş qoşuruq. Anlayıram. Amma, bu 30/28 yanaşması etik deyil axı. Bu, istehlakçının etibarından sui-istifadə etməkdir. Bu, rəqəmsal bərabərliyə zidd bir addımdır.
Azercell dövlətə məxsus şirkətdir və bu cür praktikalar ictimai məsuliyyət və sosial ədalət prinsiplərinə ziddir".
Ekspert qeyd edib ki, Antiinhisar və İstehlak Bazarına Nəzarət Agentliyi, aidiyyəti qurumlar bu məsələni araşdırmalı, "aylıq" anlayışının ədalətli və şəffaf istifadəsini təmin etməlidirlər:
"Azercell-in “1 manat – 1gün” absurd açıqlamasından sonra bir daha bu qurumun son zamanlardakı tariff siyasətinə göz gəzdirdim. Sadəcə təəssüflənməmək mümkün deyil.
Bütün istiqamət var qüvvə ilə müştəridən əlavə pul qortmağa yönəlib. Amma qarşılığnda yeni xidmətlər, yeni innovasiyalar yoxdur. 5G-dən xəbər yoxdur.
Qonşu ölkələrin mobil operatorlıarına baxsaq görərik ki bütün qüvvələrini innovasiyalara, 5G/6G-yə, süni intellektə investisiya yatırmağa, yeni xdimətlərdən gəlir əldə etməyə yönəldiblər.
Zamanında Azərbaycanın ən innovativ qurumunun belə halı ürəkaçan deyil".
