“Azerfon” 3G texnologiyasının tətbiqinə 20 mln. dollara qədər investisiya qoyub

02-12-2009 / 16:39

Bu gün “Azerfon” şirkətinin baş direktoru Gido Helbix mətbuat konfransı keçirib.

Tədbir Azərbaycanın üçüncü mobil rabitə operatoru “Azerfon” şirkətinə 3G texnologiyası üzərindən yeni xidmətlər təqdim etmək üçün Rabitə və İnformasiya Texnologiyaları Nazirliyinin müvafiq lisenziya verməsinə həsr edilib.

G.Helbix bildirib ki, yaxın günlərdə şirkət ilk 3G xidmətlərinin göstərilməsinə start verəcək: “Xidmətlər ilk bir neçə həftə ərzində test rejimində işləyəcək. Bu ilin sonundan isə Bakı, Abşeron və Naxçıvanda 3G xidmətlərindən istifadə etmək mümkün olacaq. Növbəti illərdə digər regionlarda da bu xidmətlər tətbiq ediləcək”.

Baş direktor qeyd edib ki, “Azerfon” şirkəti 3G texnologiyasının tətbiqi layihəsinin həyata keçirilməsinə 20 mln. dollara qədər investisiya qoyub: “Xidmətlərin tarifləri ümumi standartlarla yox, abunəçilərin gözləntilərinə uyğun müəyyənləşdiriləcək. Xidmətlərdən istifadə etmək üçün yeni SİM-kartların alınması tələb olunacaq”.

3G xidmətləri 2.1 Ghz diapazonunda olan tezliklərdə göstəriləcək. Xidmətlərin tətbiqinə başlandıqdan sonra istifadəçilər səs ötürülməsi ilə yanaşı, video görüntü, yüksək sürətli mobil internet və məlumat ötürülməsi, e-poçt, mobil televiziya və s. xidmətlərdən yararlana biləcəklər.

Xatırladaq ki, “Azerfon” şirkəti kommersiya fəaliyyətinə 2007-ci ildən başlayıb. “Azerfon” şəbəkəsi Azərbaycan ərazisinin 80%-ni əhatə edir və 1,5 mln. abunəçiyə xidmət göstərir. Bu ildən etibarən “Azerfon” və “Vodafone PLC” şirkətinin qeyri-səhmdar tərəfdaşıdır.


ŞƏRHLƏR





sorğu
Delta Telecom şirkətinin son istifadəçiyə birbaşa internet xidməti göstərməsi internet bazarında vəziyyəti necə dəyişə bilər ?
  • “Çəkidə aldatma” aradan qalxacaq və internetin keyfiyyəti yüksələcək.
  • İnternet bazarında sərbəst və azad rəqabət güclənəcək.
  • Qiymətlər enəcək və daha sürətli internetdən istifadə edənlərin sayı kəskin artacaq
  • İnternet bazarında rəqabət azalacaq.