Azexport.az-ın yaradılmasında hansı texnologiyadan istifadə edilib?

29-12-2016 / 12:07

Məlumat verdiyimiz kimi, bir neçə gün öncə İqtisadi İslahatların Təhlili və Kommunikasiya Mərkəzi tərəfindən idarə edilən azexport.az internet portalı təqdim edildi.

Azexport.az Microsoft Azure  platformasını seçib.

Şirkətdən Xeberler.az-a verilən məlumata görə, portalın Microsoft Korporasiyasının təqdim etdiyi ən son və innovativ xidmət olan Azure bulud platforması üzərində qurulub. Portalın qurulmasında məhz bu platformanın seçilməsinin əsas səbəbi onun bir çox üstün cəhətlərə malik olmasıdır

Məlumata görə, ilk növbədə, Microsoft Azure-un miqyaslanma xüsusiyyəti sayəsində istifadəçi trafikinin nə qədər artmasından asılı olmayaraq platforma avtomatik şəkildə genişlənir və veb-saytı artıq yüklənmələrdən qoruyur.

99,999% əlçatan olma xüsusiyyəti ilə seçilən bu platforma “Built-in” mühafizə sisteminin köməyi ilə DDoS və digər növ haker hücumlarını vaxtında müəyyən edir və qarşısını alır.

Bundan başqa, Azure platforması dünyanın 30 regionunda müvafiq uyğunluq sertifikatları ilə təltif edilmiş ən etibarlı TIER IV standartına cavab verən məlumat mərkəzlərindən fəaliyyət göstərir ki, bu da xarici ölkələrdən portala daxil olan istifadəçilərin portaldan istifadə təcrübəsini əhəmiyyətli dərəcədə yaxşılaşdırmağa imkan verəcək.

“Etibarlılıq Microsoft üçün biznes deyil, ana dəyər rolunu oynayır. Azərbaycanda bu cür əhəmiyyətli layihələrin etibarlı tərəfdaşı olmaqdan həmişə qürur duymuşuq və gələcəkdə də innovativ texnoloji yanaşmalarımızla dövlət əhəmiyyətli layihələrin həyata keçirilməsinə dəstək olacağıq”, - deyə Microsoft Azerbaijan şirkətinin baş meneceri Sərxan Həşimov bildirib.

Onun sözlərinə görə, Microsoft Korporasiyası portalın inkişaf prosesinə süni intellekt əsasında qurulmuş “Microsoft Cortana” virtual köməkçi xidməti ilə də dəstək olmağa hazırdır.

Qeyd edilib ki, “Made in Azerbaijan” brendi adı altında rəqabətqabiliyyətli və ixracyönümlü yerli məhsulların xarici bazarlarda təşviqində əhəmiyyətli rol oynayacaq bu portala Microsoft Korporasiyasının təqdim etdiyi Power BI və Skype kimi xidmətlər də inteqrasiya edilib. Belə ki, istifadəçi məhsulu satın almazdan öncə Skype vasitəsilə satıcı ilə əlaqə saxlaya və operativ şəkildə lazımi informasiyanı əldə edə bilər.

Power BI isə biznes-təhlil rolunu oynayaraq məlumatların qısa zamanda səmərəli və keyfiyyətli analizini təmin edir. Bununla yanaşı, gələcəkdə sözügedən portala LinkedIn və Bing kimi servisləri də inteqrasiya olunacaq.

Azərbaycan Prezidenti İlham Əliyevin “Azərbaycan Respublikasında istehsal olunan malların vahid məlumat bazasının yaradılması haqqında” 2016-cı il 21 sentyabr tarixli Sərəncamı əsasında hazırlanmış azexport.az internet səhifəsinin missiyası Azərbaycan mənşəli mallar haqqında məlumatların təqdim edilməsi və onların daxili və xarici bazarlarda satışı üçün əlverişli platforma yaratmaqdır. Portal dünyanın ən məşhur online satış şəbəkələrinə inteqrasiya olunaraq Azərbaycan mallarını dünyaya sərgiləyir.

Azexport.az portalı ilə əməkdaşlıq Microsoft Korporasiyasının “Azərbaycan 2020: gələcəyə baxış” İnkişaf Konsepsiyasına əsasən hazırladığı Azərbaycan üzrə Milli Planının bir hissəsidir. Microsoft-un Milli Planının əsas komponentlərinə ölkədə innovasiya sahəsinin qeyri-neft sektorunun inkişafında rolu, müəssisələrin iqtisadi səmərəliliyinin artırılması və təhsil sisteminin transformasiyası daxildir.

Məltəm Talıbzadə


ŞƏRHLƏR





sorğu
Delta Telecom şirkətinin son istifadəçiyə birbaşa internet xidməti göstərməsi internet bazarında vəziyyəti necə dəyişə bilər ?
  • “Çəkidə aldatma” aradan qalxacaq və internetin keyfiyyəti yüksələcək.
  • İnternet bazarında sərbəst və azad rəqabət güclənəcək.
  • Qiymətlər enəcək və daha sürətli internetdən istifadə edənlərin sayı kəskin artacaq
  • İnternet bazarında rəqabət azalacaq.