PROQRAMLAR

Aztelekom MMC və Məktəbəqədər və Ümumi Təhsil üzrə Dövlət Agentliyinin (MÜTDA) birgə təşkilatçılığı ilə həyata keçirilən “İnternetdən təhlükəsiz istifadə bacarıqları” korporativ sosial məsuliyyət layihəsi çərçivəsində təlimlər davam edir.

Xeberler.az bildirir ki, layihənin əsas məqsədi müəllim və şagirdlər arasında internetdən düzgün və təhlükəsiz istifadə vərdişlərinin formalaşdırılması, rəqəmsal savadlılığın artırılması və onlayn risklərə qarşı maarifləndirmənin gücləndirilməsidir.

Növbəti təlim Balakən rayonunun Qazma kəndində yerləşən 1 nömrəli tam orta ümumtəhsil məktəbində təşkil olunub. Təlim zamanı “Aztelekom”un mütəxəssisləri iştirakçılara fərdi məlumatların qorunması, rəqəmsal təhlükəsizlik, sosial şəbəkələrdə davranış qaydaları və məsuliyyətli internet istifadəsi ilə bağlı geniş məlumat veriblər.

Sessiyalar interaktiv formada təşkil olunub, real situasiyalar əsasında müzakirələr aparılıb və praktiki yanaşmalar tətbiq edilib.

Təlimlərə həmçinin Katex, Qazma, Hənifə və Mahamalar kənd məktəblərinin, eləcə də Nizami Gəncəvi, İmaməddin Nəsimi və Üzeyir Hacıbəyov adına məktəblərin müəllimləri də qoşulublar.

Bildirilib ki, layihənin növbəti mərhələlərdə ölkənin digər regionlarını da əhatə etməsi planlaşdırılır.

Qeyd edək ki, təşəbbüs çərçivəsində indiyədək Lənkəran, Qusar və Şəki rayonlarının kənd məktəblərində təlimlər keçirilib. Bununla yanaşı, Şəki–Zaqatala, Lənkəran–Astara, Quba–Xaçmaz və Gəncə–Daşkəsən regional təhsil idarələrinə aid məktəblərin müəllimləri üçün onlayn sessiyalar da təşkil olunub.