ABŞ-ın Las-Veqas şəhərində dünyanın ən iri istehlak elektronikası sərgilərindən biri - Consumer Electronics Show (CES) 2012 öz işinə başlayıb.
Tədbirin təşkilatçısı qismində İstehlak Elektronikası Assosiasiyası (CEA) çıxış edir.
Dünyanın aparıcı yüksək texnologiyalar şirkətləri sərgidən ənənəvi olaraq kompüter və məişət texnikasının, eləcə də mobil elektronikanın daha maraqlı yeniliklərinin nümayişi üçün istifadə edirlər.
RİA Novosti-nin məlumatına görə, dünyanın 140 ölkəsinin 2700-dən çox şirkətinin iştirak etdiyi CES 2012-də müzakirə ediləcək başlıca mövzulardan biri mobil elektronika olmalıdır. Bir sıra şirkətlər sərgidə Android platformasının yeni versiyası Ice Cream Sandwich əsasında qurğular, dördnüvəli ARM prosessorlu planşetlər və LTE texnologiyasını dəstəkləyən smartfonlar təqdim etməyə hazırlaşırlar.
Bundan başqa, yüksək məhsuldarlığı ilə seçilən nazik və yüngül noutbukların – “ultrabuk” modellərinin nümayişi gözlənilir.
Mobil elektronika sektoruna əhəmiyyətli təsiri Microsoft korporasiyasının 2012-ci ilin sonunda bazara çıxarmağa hazırlaşdığı Windows 8 əməliyyat sistemi də göstərməlidir. Tədbirdə bu platformanın bazası əsasında işlən həm personal kompüterlər, həm də planşetlər nümayiş etdiriləcək.
Qeyd edək ki, CES 2012-də istehlak sektorunun maraqlı yeniliklərindən biri Samsung və LG şirkətlərinin istehsalı olan və tədricən kütləvi bazara çıxan iriformatlı OLED (orqanik işıq diodları) televizorlar olmalıdır.
Bu il sərgidə rekord sayda avtomobil sənayesi şirkətləri, o cümlədən Audi, Chrysler, Ford, Daimler iştirak edir. Bu, avtomobillərə getdikcə daha çox elektron komponent və kommunikasiya vasitələrinin inteqrasiya etməsini əks etdirən əsas amillərdən biridir.
