TEXNOLOGİYA

2025-ci il yanvarın 7-dən 10-dək Las-Veqasda ilin ən böyük “CES 2025” texnologiya sərgisi keçiriləcək.

Xeberler.az məlumat verir ki, “CES 2025” sərgisində 160-dan çox ölkədən qonaqlar iştirak edəcək. Keçən il sərgiyə 138 mindən çox ziyarətçi və 4300-dən çox iştirakçı cəlb edilib. Hazırki sərgidə daha çox iştirakçı gözlənilir ki, bu da innovasiyalara və texnoloji irəliləyişlərə artan maraqdan xəbər verir.

“CES 2025”in əsas istiqamətləri süni intellekt, robototexnika, daşınan qurğular, rəqəmsal səhiyyə, nəqliyyat texnologiyaları, kibertəhlükəsizlik, eləcə də gözəllik və moda sahəsində texnologiyalardır. Aparıcı şirkətlərin milyonlarla insanın gündəlik həyatını dəyişdirə biləcək ən son məhsullarını təqdim etmələri gözlənilir.

Məsələn “NVIDIA” şirkəti “GeForce RTX 5000” seriyalı yeni nəsil qrafik kartları, həmçinin süni intellekt və robototexnika sahəsində nailiyyətlər də daxil olmaqla, ən son məhsul və texnologiyalarının bir sıra təqdimatlarını planlaşdırır.

“Intel” həmçinin “CES 2025” sərgisində öz çıxışını bəyan edib. Şirkətin “Arrow Lake” ailəsindən olan yeni prosessorlarını və “Core Ultra” çipləri bazasında hazırlanan cihazları təqdim edəcəyi gözlənilir.

İstehlak Texnologiyaları Assosiasiyasının (CTA) prezidenti və baş icraçı direktoru Hari Şapironun sözlərinə görə, sərgidə innovasiyaların gələcəyini formalaşdıran tendensiyaları müzakirə edən 300-dən çox konfrans sessiyası keçiriləcək. “CES 2025” gələcək illər üçün texnologiya gündəmini müəyyən etmək üçün bir platforma olacaq.

“CES” sərgisi ənənəvi olaraq dünyanın aparıcı brendlərinin öz nailiyyətlərini nümayiş etdirdiyi, yeni tərəfdaşlıqlar qurduğu və fikir mübadiləsi apardığı, texnologiyaları inkişaf etdirdiyi və bütün dünyada həyat keyfiyyətinin yaxşılaşdığı məkandır.