TƏHLÜKƏSİZLİK

İT şirkətlərdən ibarət olan “Coalition for Content Provenance and Authenticity” adlı birlik saxta foto və videoların aşkar edilməsi üçün nəzərdə tutulmuş yeni alqoritmin hazırlandığını elan edib.

Xeberler.az bildirir ki, hazırlanan alqoritm "blockchain" üzərində qurulacaq. Sözügedən alqoritmin əsas fərqliliyi ondan ibarət olacaq ki, o, saxta foto və videolar ilə orjinal versiyalar arasındakı kadr müqayisəsini tələb etməyəcək. Məlumata əsasən, texnoloji şirkətlər istənilən proqram təminatı ilə çalışa biləcək açıq standartın yaradılması üzərində çalışırlar. Blockchain texnologiyası sayəsində bu cür alqoritm foto və videoların mənşəylərini və onlara hansısa müdaxilələrin edilib-edilmədiyini təyin edə biləcək.

    “Adobe”, “Microsoft”, “Intel”, “Twitter”, “Sony” və “Nikon” kimi şirkətlər də hazırlanacaq alqoritmin yaradıcıları sırasına daxil olublar. Layihənin texniki özəllikləri barəsində ətraflı məlumat verilməyib. Adobe şirkətinin təmsilçiləri bildiriblər ki, təsvirin saxta olub-olmadığını təyin edən ilk funksiyalar artıq bu il istifadəyə veriləcək. Multimedia fayllarının tarixçələrini izləyən blockchain ekosisteminin isə yaxın 2 il ərzində istifadəyə veriləcəyi gözlənilir. Texnoloji şirkətlər tərəfindən yaradılmış bu koalisiya bu məsələdə çoxlu sayda sosial şəbəkə ilə əməkdaşlıq etməyi planlaşdırır.

Qeyd edək ki, günümüzdə bu və ya digər faylın “deepfake” olduğunu aşkar etmək üçün həmin faylı orijinal versiya ilə detallı şəkildə müqayisə etmək lazımdır.