TƏHLÜKƏSİZLİK

İnformasiya texnologiyalarının sürətli inkişafı kibertəhlükəsizlik sahəsində hüquqi və institusional mexanizmlərin daim yenilənməsini zəruri edir.

Xeberler.az məlumat verir ki, bunu Dövlət Təhlükəsizliyi Xidmətinin Milli Kibertəhlükəsizlik Mərkəzinin rəisi Davud Rüstəmov “İnformasiya Təhlükəsizliyi Testləri” laboratoriyasının açılış mərasimində çıxışı zamanı deyib.

Onun sözlərinə görə, informasiya texnologiyaları sahəsində aparılan tədqiqatların qiymətləndirilməsi üzrə beynəlxalq müstəvidə minlərlə standart mövcuddur və bu, dövlətlər qarşısında ciddi tələblər formalaşdırır.

“Laboratoriyanın istifadəyə verilməsi Azərbaycanda mövcud proqram və aparat təminatlarında boşluqların vaxtında aşkarlanması, risklərin azaldılması və kiberinsidentlərin qarşısının qabaqlayıcı şəkildə alınması baxımından mühüm əhəmiyyət daşıyır. Rəqəmsal inkişafın yüksək tempi, xüsusilə, süni intellekt texnologiyalarının informasiya mühitinə sürətli inteqrasiyası həm yeni imkanlar, həm də əlavə risklər yaradır. Bu isə kibertəhlükəsizlik sahəsində biliklərin və praktiki bacarıqların fasiləsiz artırılmasını, hüquqi mexanizmlərin müasir çağırışlara uyğunlaşdırılmasını zəruri edir. Hazırda dövlət təhlükəsizliyi strukturları tərəfindən rəqəmsal sübutların tanınması və onların hüquqi dövriyyəyə daxil edilməsi ilə bağlı normativ təşəbbüslər irəli sürülüb və müvafiq təkliflər Milli Məclisə təqdim olunub. Yaxın perspektivdə “rəqəmsal sübut” anlayışının Azərbaycanda tam hüquqi status qazanması gözlənilir. Bu yanaşma cinayətlərin texniki izlərinin – proqram təminatlarında, aparat qurğularında, informasiya sistemlərində və şəbəkə mühitində aşkar olunması, toplanması və hüquqi baxımdan etibarlı sübut kimi tanınması üçün vahid hüquqi əsas formalaşdıracaq”, - deyə Davud Rüstəmov qeyd edib.

Milli Kibertəhlükəsizlik Mərkəzinin rəisi əlavə edib ki, beynəlxalq təcrübə və qlobal tendensiyalar, o cümlədən BMT çərçivəsində qəbul edilən yeni hüquqi mexanizmlər dövlətlər qarşısında kibertəhlükəsizlik sahəsində davamlı inkişaf və institusional güclənmə öhdəliyi yaradır. Onun sözlərinə görə, Bakı Ali Neft Məktəbi bu proseslərdə elmi və tədris potensialı ilə ön sıralarda yer alan tərəfdaşlardan biridir.