E - HÖKUMƏT

Əmək və Əhalinin Sosial Müdafiəsi Nazirliyinin ümumi fəaliyyət istiqamətlərinin rəqəmsallaşması tarixçəsinə nəzər salsaq, burada həmişə lokomotiv Dövlət Sosial Müdafiə Fondu olub. Çünki nazirliyin fəaliyyət istiqamətinin bir çox sahələri fondun fəaliyyəti ilə birbaşa əlaqədardır. Hazırda nazirlik 80-dən artıq qurumla inteqrasiya edilib. Burada həm dövlət, həm də özəl sektora aid qurumlar var. 50-dən artıq proaktiv xidmətlər mövcuddur və 90 faizdən yuxarı elektronlaşmaya nail olunub. Ümumilikdə isə nazirliyin rəqəmsallaşması birbaşa ökədə aparılan islahatlarla bağlıdır.

Xeberler.az məlumat verir ki, bunu DOST Agentliyinin DOST Rəqəmsal İnnovasiyalar Mərkəzinin direktoru Kənan Əkpərov "Müasir dünyanın çağırışları kontekstində sosial müdafiə sistemlərinin uyğunlaşdırılması" mövzusunda beynəlxalq konfransda "Sosial sahədə innovasiyalar: Azərbaycan və rəqəmsal transformasiya" mövzusunda təqdimatla çıxışı zamanı deyib.

"Nazirliyin 2025-2027-ci illər üçün rəqəmsallaşma ilə bağlı strategiyası artıq təsdiq edilib. Burada ana hədəf data əsaslı qərarvermənin genişləndirilməsi, süni intellektlə bağlı xidmətlərin hazırlanması və həyata keçirilməsidir. Buraya istər vətəndaş müraciətlərinin süni intellekt əsasında cavablandırılması, istər əlilliyin təyinatı prosesində süni intellekt əsaslı həllərin tətbiqi, istərsə də məşğulluq sahəsində süni intellekt əsaslı həllərin yaradılması və digər istiqamətlərdə işlər daxildir. Ötən il nazirliyə 663 milyon sorğunun sistem vasitəsilə həyata keçirilməsi öz əksini tapıb. Burada istər tibbi sığorta, istər təhsil alan şəxslər, istərsə də bankdan kredit götürən şəxslərin razılığı əsasında məlumatlar aidiyyəti dövlət orqanları və özəl sektorla mübadilə edilib. Ümumilikdə, nazirliyin 159 xidmətinin 60-ı proaktiv şəkildə həyata keçirilir", - deyə o vurğulayıb.

"E-sosial" internet portalı barədə məlumat verən K.Əkpərov bildirib ki, hazırda portaldan 2,3 milyondan çox vətəndaş daim aktiv şəkildə istifadə edir. İstifadə imkanlarının genişləndirilməsi ilə bağlı işlər həyata keçirilir:”Məqsədimiz vətəndaşların nazirliyə müraciət etmədən məlumatlandırılmasını həyata keçirmək, proaktiv məlumatlandırma mexanizmini genişləndirmək və vətəndaşların məlumatları rahat formada əldə etməsini təmin etməkdir. Vətəndaşlarımız nazirliyin fəaliyyət sahəsindən demək olar ki, doğulandan ölənə qədər - bütün həyat dövründə aktiv şəkildə istifadə edirlər. Burada uşağın anadan olması zamanı təyin olunan müavinətdən tutmuş dəfnə görə müavinət, pensiya dövrü, sosial sığorta, fərdi uçot, əmək münasibətləri və s. yer alıb. Azərbaycan əhalisinin sayı 10,2 milyonu ötüb. Biz onların 90 faizdən çoxunu öz sistemlərimizdə əhatə edirik. Ən yaşlı pensiyaçımız 135 yaşlı xanımdır və Lənkəran şəhərində yaşayır. Ümumilikdə isə 100 yaşdan yuxarı 2 mindən çox şəxs pensiya və sosial müavinətlər alır. Hazırda "E-sosial" internet portalının funksiyalarının genişləndirilməsi ilə bağlı işlər həyata keçirilir. Portal üzərindən məşğulluq istiqamətində CV yaradılması ilə bağlı işlər görülür. Həmçinin elektron birja imkanları, vətəndaşların əmək bazarına çıxışı ilə bağlı xidmətlərin portal üzərindən reallaşdırılması üçün də tədbirlər görülür", - deyə K.Əkpərov fikirlərinə yekun vurub.