TƏHLİL

Xeberler.az bildirir ki, Nəqliyyat Rabitə və Yüksək Texnologiyalar Nazirliyinin (NRYTN) özəl provayderlərə qarşı haqsız rəqabəti davam edir. Bir müddətdir ki, müxtəlif regionlardan özəl provayderlərin Aztelecom tərəfindən sıxışdırılaraq müştərilərin məcburən dövlət provayderinə keçməsi və internetin keyfiyyətsiz olması ilə bağlı şikayətlər daxil olur. 

Belə ki, özəl İSP-lər üçün rabitə quyularına giriş qadağan olunub, ATS-dəki dövlət resursları da özəl provayderlərin üzünə bağlanıb. Dövlətə məxsus olan telekommunikasiya resurslarından dövlət və özəl İSP-lərin bərabər əsaslarla istifadəsi mümkünsüz olub. 

Hazırda bir sıra provayderlər bununla bağlı məhkəməyə müraciət edib.

Məsələ ilə bağlı Azərbaycan İnternet Formunun Prezidenti, ekspert Osman Gündüz münasibət bildirib:

“NRYTN innovasiya adı altında, müştəriyə yaxın ərazidə ONA tipli ATS quraşdırır. Köhnə ATS-dən buradək olan məsafəni fiberoptik edir. Buradan müştəriyədək olan məsafə isə yenə də köhnə mis məftil üzərində quraşdırılır.

Bundan sonra NRYTN özəl provayderə bildirir ki, onların köhnə ATS-də olan avadanlıqları dərhal yeni ONA ətrafına daşınmalıdır. Provaydrelər isə təbii ki, qısa müddətdə burada öz avadanlıqlarını quraşdıra bilmir. Çünki ONA-da yer yoxdur, həmin ərazidə torpaq icarəyə götürmək, quraşdırma işləri aparmaq, elektrik xətti çəkmək və s. elə də asan məsələ deyil və zaman tələb edir.

Belə olan halda isə onların bütün müştəriləri, müştərinin və provayderin razılığı olmadan Aztelekom üzərinə keçirilir“.

Osman Gündüzün sözlərinə görə, müştəriləri “oğurlanan“ rayonlar arasında birinci yeri Abşeron tutur. Bu rayondan son zamanlar özəl İSP-lərin toplam təxminən 23 min müştərisi oğurlanıb.