TƏHLİL

Xeberler.az bildirir ki, Antiinhisar Dövlət Xidməti Nəqliyyat Rabitə və Yüksək Texnologiyalar Nazirliyi (NRYTN) üçün icrası məcburi olan daha bir qərar qəbul edib. Səlahiyyətli dövlət qurumları Nəqliyyat , Rabitə və Yüksək Texnologiyalar Nazirliyinin inhisarçılığının qarşısını almaq məqsədilə konkret addımlar atmağa başlayıb. Antiinhisar Dövlət qurumu və İstehlakçıların Hüquqlarının Müdafiəsi Dövlət Xidməti özəl provayderlərin, o cümlədən AzərConnect, AzerTelecom və digərlərinin Baktelekoma (Bakı Telefon Rabitəsi MMC) qarşı iddiasını araşdırıb.  Adı çəkilən qurumlar Baktelekom tərəfindən antiinhisar qanunvericiliyin tələblərinin pozulmasından, haqsız rəqabətə yol verilməsindən , kabel-kanal sistemindən istifadəyə məqsədyönlü olaraq şərait yaradılmamasından Antiinhisar Dövlət Xidmətinə müraciət ediblər. İnternet Formunun Prezidenti, ekspert Osman Gündüz məsələ ilə bağlı fikir bildirib:

"Uzun müddətdir ki, NRYTN heç bir özəl provayderi və operatoru dövlətə məxsus olan kabel-kanal sisteminən istifadəyə yaxın buraxmır. Nazirlik kabel-kanal sistemində sıxlıq olduğunu bu səbədən xətlərin yalnız icarəyə verə biləcəyini bildirirdi.  Provaydrelər isə bunun səmərəli olmadığını, icarə haqlarının yüksək olduğunu, təhlükəsizlik baxımından məqsədəuyğun olmadığını əsas gətirərək özəl xətlərin çəkilməsində israr edirdilər. Dövlətə məxsus olan bu resursdan istifadə ilə bağlı Qaydalar isə indiyədək hazırlanmayıb. Nazirlik 3 ildir ki, özəl provayderlərdən daxil olan bütün müraciətlərə, texniki imkanın olmaması, kabel-kanal sistemində sıxlığın olmasını əsas gətirərək rədd cavabı verirdi. Özəl provayderlər isə bunun qəsdən edildiyini, kabel-kanal sistemində imkanların mövcud olduğunu, rədd cavabının haqsız rəqabət məqsədilə, dövlət operatorları olan Baktelekom-un və Aztelekom-un bazarda üstünlük qazanmaq üçün edildiyini bildirirdilər. Onlar kabel-kanal sisteminə birgə baxış keçirilməsini, hətta imkanların olmadığı sahələrdə birgə investisiya yatırımı təklif edirdilər. Beləliklə, cari ayın əvvəli Antiinhisar Dövlət Xidməti daxil olan müraciətləri araşdırararq , Haqsız Rəqabət haqqında qanunun, Telekommunikasiya haqqında qanunun, antiinhisar qanunvericiliyin tələblərini əsas tutaraq NRYTN üçün icrası məcburi olan qərar qəbul edib. Qərarda Bakı şəhəri üzrə bəlli ərazilərdə kabel-kanal sisteminə ekspertiza-baxış keçirilməsi, şəraitin olduğu yerlərdə sistemdən istifadə üçün dərhal imkanların yaradılması, şəratin olmadığı iddia olunan ərazilərdə isə bunun səbəbləri haqqında , kabel-kanal sisteminin gücü və mövcud durumu haqında Antiinhisar qurumuna əsaslandırılmış məlumat verilməlidir".

Ekspertin sözlərinə görə, Antiinhisar Dövlət Xidmətinin qərarı özəl provayderlər üçün bağlı olan rabitə quyularının qapağının açılmasına səbəb olacaq.

Ümid edirəm, NRYTN tezliklə bunu icra edəcək, dövlət və özəl provayderlərin bu kabel-kanal sistemindən bərabər əsaslarla istifadəsi üçün Qaydalar müəyyən edəcək və haqsız rəqabətə yol verməyəcək- deyə Osman Gündüz bildirib.

Sonda ekspertin sözlərinə görə, Antiinhisar Dövlət Xidməti, baxmayaraq ki, Prezidentin ilyarım öncə verdiyi fərmana uyğun olaraq tam formalaşmayıb, son dövrlərdə görünür ki , ölkədə aparılan islahatlara uyğun olaraq, ciddi, prinsipial qərarlar qəbul edir. Anlaşılandır ki, ciddi maraq toqquşmaları yaradan bu tip qərarlar asanlıqla qəbul edilmir.