RƏQƏMSAL DÜNYA

İTV və Avropa Yayım Birliyi “Avroviziya” ilə bağlı rəsmi açıqlama verib.

Xeberler.az bildirir ki, bununla bağlı Azərbaycan İnternet Forumunun Prezidenti, ekspert Osman Gündüz öz “Facebook” səhifəsində paylaşım edib.

“Beləliklə, İTV və Avropa Yayım Birliyinin rəsmi açıqlamalarına əsasən baş verənləri aşağıdakı xronoloji ardıcıllıqla düzmək olar :

1. İTV (Azərbaycan Münsifləri) “Ukrayna 12 bal” qərarını öncədən “Avroviziya” təşkilatçılarına (AYB) göndərib

2. AYB bu qərarı bizim münsiflərin yarımfinal səsləri ilə müqayisə edərək şübhə ilə qarşılayıb. Lakin bu haqda İTV-yə məlumat verilmir və bizim münsiflər bundan xəbərsiz olur.

3. Bizim münsiflərin qərarını şübhə altına alan AYB final zamanı İTV-dən tələb edir ki, canlı yayımda "başqa nəticələr" açıqlansın.

4. İTV bundan imtina edir və dərhal AYB təşkilatçılarına baş verənlərlə bağlı sorğu göndərir, canlı yayımda münsiflərin özəl qərarının açıqlanacağı və məsələnin ictimailəşdiriləcəyi bildirilir.

5. Məhz bundan sonra AYB yarımfinalda olanlara əsaslanaraq Azərbaycan tərəfdən   “düzgün olmayan səsvermə sxemindən” istifadə edildiyini bildirir.

6. Finalın sonunda isə Azərbaycanla canlı bağlantı alınmır və münsiflərimiz “Ukrayna 12 bal” qərarını canlı olaraq elan edə bilmir. Azərbaycan tərəfi bağlantının alınmamasını AYB-nin təqsiri üzündən baş verdiyini bildirir. AYB isə Azərbaycan tərəfinin sorğusuna əsasən bunun texniki problem olduğunu bildirib.

7. Canlı bağlantı alınmadığından AYB yarışın finalı ilə bağlı İTV-nin deyil , öz nəticələrini elan edir və Ukraynaya 6 bal verildiyi elan olunur.

8. İTV bütün baş verənlərlə bağlı hər hansı rəsmi açıqlama vermir, İTV nümayəndələri sadəcə canlı bağlantı imkanının AYB tərəfindən yaradılmadığını elan edir.

9. Finaldan dərhal sonra AYB Azərbaycan tərəfinin səsvermə qaydalarını pozduğunu və münsiflərin manipulyasiya etdiyini, Azərbaycan və daha 5 ölkənin münsiflərinin müsabiqədən kənarlaşdırıldığını rəsmi açıqlayır. Azərbaycan tərəfə sübutlar təqdim edilmir.

10. Bir gün sonra İTV baş verənlərlə bağlı AYB-ni ittiham edən rəsmi açıqlamanı yayır və ədalətli araşdırma tələb edir və bunun nəticəsindən asılı olaraq növbəti addımlar atılacağını bildirir.

Araşdırılmalı məqamlar :

1. Yarışın yayımı prosesində iştirak edən telekommunikasiya operatorlarına sorğular verməklə canlı bağlantının nə üçün alınmamasını aydınlaşdırmaq olar.

2. İtaliya təhlükəsizlik qurumuna sorğu verməklə final anında kiber hücumun olması və bunun canlı bağlantıya təsirləri haqqında məlumat almaq olar.”

Ekspert qeyd edir ki, hazırda cəmiyyəti daha çox narahat edən məsələ odur ki, baş verənlər Azərbaycana qarşı ikili standartlardı, yoxsa doğurdanmı İTV qəsdən canlı bağlantıya qoşulmayıb.

“Doğurdanmı bizim münsiflər manipulyasiya edib?

Bu baxımdan AYB-nin Azərbaycana qarşı ittihamında irəli sürülən "yarımfinal və final mərhələsində verilən səslərdəki qəribəlik", "düzgün olmayan səsvermə sxemi” məsələlərinə İTV-nin daha ağlabatan formada aydınlıq gətirməsi faydalı olardı.”