İKT TƏHSİL

Məlumat verdiyimiz kimi, 27 Mart Azərbaycanda Elm Günüdür.

“Ötən il, 28 iyul 2022-ci il tarixdə elm sahəsində tənzimləmə və idarəetmənin təkmilləşdirilməsi, elmi fəaliyyətin əlaqələndirilməsilə bağlı Prezident fərmanı imzalanıb. Bu fərman əsasında Elm və Təhsil Nazirliyi yaradılıb və AMEA tabeliyində olan elmi müəssisə və təşkilatların, elmi-xidmət qurumların bir çoxu bu Nazirliyin tabeliyinə keçirilib. Bu fərman əsasında Nazirlikdə Elm və Ali Təhsil üzrə Dövlət Agentliyi yaradılıb. Maraqlıdır ki, hökumət indiyədək bu Agentliyi formalaşdıra bilməyib”.

Xeberler.az məlumat verir ki, bunu Azərbaycan İnternet Forumunun Prezidenti, ekspert Osman Gündüz Elm Günü ilə bağlı paylaşımında qeyd edib.

Onun sözlərinə görə, adı çəkilən fərmanla Akademiyanın tabeliyində olan “AMEA Yüksək Texnologiyalar Parkı" da Nazirliyin tabeliyinə verilib.

Hansı ki, adı çəkilən fərman əsasında Nazirlər Kabineti 3 ay müddətində Nazirliyin yeni əsasnaməsini və strukturunu, həmçinin Agentliyin əsasnamələrini hazırlamalıydı. Elmi müəssisələrin gələcək taleyi müəyyənləşməliydi.

Elm və Ali Təhsil Nazirliyi AMEA-dan ayrılan elmi müəssisələrin fəaliyyətinin səmərəliliyinin artırılması istiqamətində təkliflər hazırlamalıydı:

“Görünən odur ki, fərmanda bu məqsədlə nəzərdə tutulan müddət başa çatsa da hələlik nə qeyd olunan Agentlik fəaliyyətə başlamayıb, nə də Nazirliyin tabeliyinə verilən elmi müəssisələrin gələcək fəaliyyətinə aydınlıq gətirilməyib”.

“Gözlənilirdi ki, Elm günü ilə bağlı hökumət və Nazirlik həm Agentliyin fəaliyyətə başlaması, həm də elmi institutların gələcək taleyi ilə bağlı rəsmi açıqlamalar olacaq. Təəssüf ki, hələlik bunlar müşahidə olunmur. Görünür ki, bu sahədə hökümətdə fikir ayrılıqları var və hələlik oturuşmuş bir baxışlar formalaşmayıb. Bu sahədə, elmi tədqiqatlar və innovasiyalar sahəsində müəyyən işlər görülsə də , uzun illərdən bəri öz həllini gözləyən xeyli problemlər var. Beynəlxalq statistika və reytinqlər də bunu göstərir. AMEA-da ötən müddətdə müəyyən islahatlar aparılıb. Bu yaxınlarda baş tutun AMEA Ümumi yığıncağındakı çıxışlarda da bu özünü göstərirdi.Ümid edək tezliklə Agentliyin formalaşması baş tutacaq, AMEA-dan ayrılan elmi institutların gələcək fəaliyyət prinsiplərinə aydınlıq gətiriləcək, elm sahəsinin inkişafı sürətlənəcək, universitetlər və elmi müəssisələr birgə elmi tədqiqatları gücləndirəcəklər”,-deyə ekspert vurğulayıb.