STARTAP AZƏRBAYCAN

Ölkədə “Events Azərbaycan” layihəsi fəaliyyətə başlayıb.

Xeberler.az-ın məlumatına görə, layihənin əsas məqsədi  müxtəlif tədbirlərin təşkili,  tədbirlərə informasiya dəstəyi, biletlərin satışı və onlayn sifarişi , tədbir təşkilatçılarının müxtəlif xidmətlərinin göstərilməsidir.

“Events Azərbaycan”  tədbirlərin marketinq və PR strategiyasını müasir texnologiyalardan  və innovasiyalardan istifadə etməklə daha da təkmilləşdirməyi nəzərdə tutub.

Bu məqsədlə artıq ölkədə təşkil olunan  və nəzərdə tutulan bütün  tədbirlər haqqında məlumatları, tədbir təşkilatçıları və istifadəçilər üçün  çoxsaylı onlayn xidmətləri özündə birləşdirən  Events.az portalı hazırlanıb.

Events.az sizi maraqlandıran tədbirləri (seminar,konfrans,konsert,sərgi,təqdimat və s.) izləyəcəyiniz və öz tədbirlərinizi təqdim edə biləcəyiniz sosial bir platformadır.

Resursda  tədbirlə əlaqəli olan təşkilatçıların xüsusi hesablarının yaradılması imkanları nəzərdə tutulub. Həmin hesablarda  təşkilatçıların cari və  gələcəkdə planlaşdırılan tədbirləri haqqında məlumatlar yerləşdirilir. Saytda tədbirlərin təşkilatçıları, sponsor və dəstək verənləri həmçinin tədbirlərin keçiriləcəyi məkanlar haqqında geniş məlumat bazası formalaşdırılacaq.

Events.az -da maraqlara uyğun olaraq tədbirlərin asan tapılması imkanları nəzərdə tutulub. Tədbirlər mövzulara uyğun olaraq qruplaşdırılıb. Resursda qeydiyyatdan keçənlər açar sözlərdən istifadə etməklə öz maraq dairəsinə uyğun tədbirlər haqqında məlumat əldə edə bilirlər. İstifadəçilər  həmçinin  saytda yerləşdirilən tədbirlərlə bağlı  müəyyən dəyişiklikləri, vaxtı və yeri haqqında yeni məlumatları bildiriş vasitəsilə əldə edə biləcəklər.

Tədbirlərin axtarış sistemində maraqlara uyğun olaraq açar sözlər vasitəsilə süzgəc sistemindən istifadə olunub.

Yaxın vaxtlarda Events.az-in mobil versiyasını yaratmaq nəzərdə tutulub.

Sevinc Əsədova