E - HÖKUMƏT

Ölkəmizin mənbələrindən əmək ödənişi və məcburi dövlət sosial sığorta haqqına cəlb olunan digər gəlirləri əldə edən əcnəbilərin Azərbaycan Respublikası Əmək və Əhalinin Sosial Müdafiəsi Nazirliyi yanında Dövlət Sosial Müdafiə Fondunun fərdi uçot sistemində qeydiyyata alınması prosesi davam etdirilir.

Əmək və Əhalinin Sosial Müdafiəsi Nazirliyinin  İctimaiyyətlə əlaqələr şöbəsindən Xeberler.az-a verilən məlumata görə, bu ilin avqust ayında əlavə olaraq 305 nəfər əcnəbi vətəndaşa fərdi şəxsi hesab açılıb. Sistemin əhatə etdiyi xarici ölkə vətəndaşlarının sayı cari ilin 01 sentyabr tarixinə olan statistikaya əsasən 32 836 nəfər təşkil edir ki, bu da ötən ilin müvafiq dövrü ilə müqayisədə  25.5 faiz çoxdur. Sistemdə qeydiyyata alınmış əcnəbilərin 88.4 faizi kişilər, qalanları qadınlardır.

 Fərdi şəxsi hesabı olan əcnəbilər ümumilikdə 120 ölkəni təmsil edirlər. Onların sırasında say çoxluğuna görə əvvəllərdə olduğu kimi, yenə də ilk yerləri Тürkiyə (15 257 nəfər), Gürcüstan (3 209 nəfər)  Rusiya (1 880) vətəndaşları tutur.

Sistemdə Özbəkistan (1752 nəfər), Hindistan (1382 nəfər), İran (1032 nəfər), Çin (909 nəfər), Banqladeş (798 nəfər), Pakistan (690 nəfər), Birləşmiş Böyük Britaniya və Şimali İrlandiya (642 nəfər) , Ukrayna (539 nəfər) , Türkmənistan (315 nəfər), Filippin (293 nəfər), ABŞ (283 nəfər), Almaniya (266 nəfər), Qazaxıstan (250 nəfər), İtaliya (213 nəfər) və s. ölkələrin vətəndaşları da qeydiyyatdadır. 

Xeberler.az