TƏHLİL

  2008-ci ildə qeyri-neft sektorunda ən çox gəlir gətirən sahə rabitə və informasiya kommunikasiya texnologiyaları (İKT) sahəsidir. Belə ki, son illər ölkədə İKT sahəsində müşahidə olunan dinamik inkişaf 2008-ci ildə də üstünlüyünü qoruyub saxlayıb. Dövlət Statistika Komitəsindən Lent.az-a bildiriblər ki, bu ilin yanvar-oktyabr aylarında İKT və poçt sektorunda fəaliyyət göstərən müəssisələr tərəfindən istehsal olunan məhsul və göstərilən xidmətlərin həcmi 743 milyon manat olub. Bu, cari ilin müvafiq dövrü il müqayisədə 29,3 faiz çoxdur. Bu ilin 10 ayında qeydə alınan artım isə ötürücü cihazların istehsalında 2,6 dəfə, nəzarət-ölçü cihazlarının istehsalında 2 dəfə, texnoloji proseslərin tənzimlənməsi və nəzarət cihazlarının quraşdırılmasında isə 61,6 faiz təşkil edib.

  Elektrik-məişət mallarının və radio-televiziya aparatlarının topdan satışında artım 72,9 faiz olub. Bundan başqa kompüterlərin, kompüter avadanlığının topdan satışı və proqram təminatında 25,5 faiz, hesablama texnikasının və ofis maşınlarının təmiri və onlara texniki xidmət göstərilməsində 6,4 dəfə, elektron və radioelementlərin istehsalında isə 3,3 dəfə artım qeydə alınıb.

  Ümumilikdə bu il Azərbaycanda İKT sektorunda əldə olunan gəlirlərin ümumi daxili məhsuldakı payı 2 faiz, internet istifadəçilərinin sayı 67 faiz artıb. Bu İKT xidmətlərinin qiymətini azalması fonunda baş verib. Belə ki, internet qiymətləri ilin əvvəlinə nisbətən 30-40 faiz aşağı düşüb.

xeberler.az/Ellada