TEXNOLOGİYA

SpaceX şirkətinin rəhbəri İlon Mask orbitə 1000-ə qədər raket əleyhinə müdafiə (RƏM) peyki çıxarmağı təklif edir. Layihənin ən qeyri-adi tərəfi ondan ibarətdir ki, peyklərdən ibarət bu qrup, o cümlədən raketləri tutmaq üçün nəzərdə tutulan peyklər hökumətə abunəlik əsasında xidmət göstərəcək.

Xeberler.az “Reuters”ə istinadən məlumat verir ki, Maskın bu qərarı ABŞ Prezidenti Donald Trampın hakimiyyətə gəldiyi dövrdə verdiyi bəyanatla bağlıdır. Tramp bildirib ki, raket zərbələri ölkə üçün ən ciddi təhlükədir və bunun qarşısını almaq üçün ABŞ ərazisi tamamilə “Qızıl günbəz”lə, yəni, İsrailin raket əleyhinə müdafiə sisteminə bənzər müdafiə qalxanı ilə əhatə olunmalıdır. Müdafiə sənayesi kompleksi şirkətləri arasında elan edilən müsabiqədə qalibin çox güman ki, “SpaceX”, “Anduril” və “Palantir” şirkətlərindən ibarət birgə komandanın olacağı gözlənilir.

İlon Maska məxsus “SpaceX”, proqram təminatı hazırlayan “Palantir” və pilotsuz uçuş aparatları istehsalçısı olan “Anduril” startapları 180-dən çox rəqib arasında “Qızıl günbəz” layihəsinin tenderinin əsas favoritləridir.

Bu üç şirkətin nümayəndələri yaxın həftələrdə Tramp administrasiyası və Pentaqon rəsmiləri ilə görüşərək öz təkliflərini təqdim edəcəklər. Bu təkliflərdən biri raket buraxılışlarını və onların uçuş trayektoriyalarını izləyəcək 400-dən 1000-dək hərbi peykin orbitdə yerləşdirilməsidir.

Bundan əlavə, 200 zərbə peykindən ibarət ayrıca donanmanın yaradılması da planlaşdırılır. Bu peyklər raket və ya lazerlərlə təchiz olunaraq düşmən raketlərini məhv etməyə imkan verəcək. Peyklərin silahlarla təchiz edilməsi ilə xüsusi qurumlar məşğul olacaq.