TƏHLÜKƏSİZLİK

Səfər çərçivəsində Xidmət rəisi general-leytenant İlqar Musayevin Rumıniyanın Xüsusi Telekommunikasiya Xidmətinin rəisi general-leytenant Lonen Sorin Balan ilə Buxarest Parlament Sarayında görüşü baş tutmuşdur.

Xüsusi Telekommunikasiya Xidməti (XTX), Rumıniyada dövlət orqanları və qanunla nəzərdə tutulmuş digər istifadəçilər üçün xüsusi telekommunikasiya sahəsində fəaliyyətləri təşkil edən, nəzarət edən və əlaqələndirən mərkəzi ixtisaslaşmış orqandır. General -leytenant Lonen Sorin Balan XTX-nin hərbi struktura malik olduğunu və milli müdafiə sisteminin bir hissəsi olduğunu qeyd etmişdir. XTX istifadəçilər üçün naqil, radio, optik və ya digər elektromaqnit sistemləri vasitəsilə hər hansı xarakterli işarələrin, siqnalların, yazıların, təsvirlərin, səslərin və ya məlumatların ötürülməsini təmin edir.

Eyni zamanda XTX-nin fəaliyyətinin Ali Milli Müdafiə Şurası tərəfindən təşkil edildiyi və Rumıniya Parlamenti tərəfindən nəzarət həyata keçirildiyini bildirilmişdir.

İlqar Musayev Xidmətin dövlət qurumları üçün informasiya təhlükəsizliyini həyata keçirən mərkəzi icra hakimiyyəti orqanı olduğunu, mütəmadi olaraq dövlət qurumlarının informasiya sistemlərinin audit və monitorinqini təşkil etdiyini bildirmiş, ortaq təcrübələr haqqında ətraflı məlumat vermiş və qarşılıqlı maraq doğuran məsələlər ətrafında fikir mübadiləsi aparmışdır. Görüşdə birgə əməkdaşlıq istiqamətində görüləcək işlər müzakirə edilmişdir