TƏHLÜKƏSİZLİK

Bakı Ali Neft Məktəbində (BANM) “İnformasiya Təhlükəsizliyi Testləri” laboratoriyasının fəaliyyətə başlaması ölkədə informasiya və kibertəhlükəsizlik sahəsində praktik bilik və bacarıqlara əsaslanan kadr hazırlığının yeni mərhələyə keçidi deməkdir.

Xeberler.az məlumat verir ki, bu barədə laboratoriyanın açılış mərasimdə çıxış edən XRİTDX-nin rəisi, general-leytenant İlqar Musayev bildirib.

XRİTDX-nin rəisi qeyd edib ki, müasir dövrdə dövlət təhlükəsizliyinin əsas komponentlərindən biri informasiya mühitinin qorunmasıdır və bu istiqamətdə peşəkar insan resurslarının formalaşdırılması xüsusi əhəmiyyət daşıyır.

“Yaradılmış laboratoriya ali təhsil mühiti ilə dövlət qurumunun əməliyyat təcrübəsini birləşdirən mühüm platformadır. Laboratoriya yalnız BANM-də təhsil alan tələbə, müəllim və tədqiqatçılar üçün deyil, eyni zamanda, dövlət qurumlarının əməkdaşları üçün də beynəlxalq standartlara uyğun kiberinsident ssenariləri üzərində birgə işləmək, təlimlərdə iştirak etmək və praktiki təcrübə əldə etmək imkanı yaradacaq. Bu yanaşma laboratoriyanı təkcə tədris məkanı deyil, həm də kibertəhlükəsizlik üzrə əməliyyat hazırlığının yoxlanıldığı və təkmilləşdirildiyi test platformasına – milli kadr hazırlığı bazasına çevirir”, - deyə İlqar Musayev vurğulayıb.

Qlobal rəqəmsal mühitdə müşahidə olunan texniki fasilələrin informasiya təhlükəsizliyində dayanıqlılığın və operativ monitorinqin vacibliyini göstərdiyini sözlərinə əlavə edən general-leytenant aparılmış monitorinqlər nəticəsində XRİTDX tərəfindən təhlükəsizliyi təmin olunan dövlət informasiya ehtiyatlarına, “AzStateNet” şəbəkəsinə və GOV.AZ domen zonasına hər hansı təsirin qeydə alınmadığını vurğulayıb: “Bu fakt ölkədə tətbiq edilən çoxsəviyyəli mühafizə mexanizmlərinin və 24/7 monitorinq sisteminin effektivliyini açıq şəkildə nümayiş etdirir. Gələcək risklərə hazırlığın təmin edilməsində yerli mühafizə sistemlərinə əsaslanan təhlükəsizlik infrastrukturu və peşəkar kadr potensialı həlledici rol oynayır. Bu baxımdan BANM-də yaradılmış laboratoriya kimi platformalar strateji əhəmiyyət daşıyır”.