TƏDBİRLƏR

Bakıda  “İnnovasiya ekosisteminin qurulması” adlı seminarlar davam edir.

Xeberler.az-ın məlumatına görə, bu gün seminar tədbirdə Bakı Mühəndislik Universitetində keçirilir.

Seminarın keçirilməsində məqsəd müvafiq dövlət və özəl qurumların birgə innovasiya ekosisteminin təşəkkülü ilə bağlı fəaliyyət planının hazırlanmasına dəstək verməkdir.

Müvafiq qurumların nümayəndələrinin, xarici ekspertlərin iştirak etdikləri tədbirdə Bakı Mühəndislik Universitetinin rektoru, professor Havar Məmmədov çıxış edərək rəhbərlik etdiyi ali məktəbin fəaliyyəti barədə ətraflı məlumat verib.

Seminarın əhəmiyyətindən danışan rektor qeyd edib ki, universitet-biznes-dövlət əməkdaşlığını özündə cəmləşdirən, innovativ ekosistemin formalaşması və inkişafında önəmli rol oynayan sahibkarlıq universiteti modeli hazırda daha da aktuallaşıb. Bu səbəbdən də sahibkarlıq universitetlərinin ölkəmizdə formalaşmasına xüsusi diqqət göstərilir.

Sonra xarici ölkələrdən olan ekspertlərin “Vençur maliyyə sazişlərinə giriş”, “Regional keys: Rusiya, Qazaxıstan və digər MDB ölkələrində innovasiya ekosistemin təkamülü, “MDB məkanında vençur maliyyəsinin başlanması” və digər mövzularda məruzələri dinlənilib, vençur maliyyəsi, sahibkarlıq təhsili və mədəniyyəti mövzusunda təlim və müzakirələr aparılıb.

Qeyd edək ki, tədbir Təhsil, İqtisadiyyat, Rabitə və Yüksək Texnologiyalar nazirlikləri, Azərbaycan Milli Elmlər Akademiyası və Bakı Mühəndislik Universiteti tərəfindən təşkil olunub.

Günel