TV VƏ RADİO

Sentyabrdan etibarən kabel televiziyaları vahid tarifə keçərək qiyməti 10 AZN edəcəklər. Məlum olduğu kimi, əvvəllər əksər Kabel TV-lərdə baza paketin aylıq ödənişi 9 manat idi.

Xeberler.az-ın məlumatına görə, artıq kabel teleziyaları bu barədə razılığa gəliblər.

Qiymətin artması ilə bağlı məlumatı B&BTV Communications, ATV Plus, Smart TV Plus, KATV1, AileTV və Connect şirkətləri təsdiqləyib.

Bu xəbər ictimaiyyət tərəfindən birmənalı qarşılanmayıb. Bəzi  istifadəçilər kabel televiziyaların bu qiymət artımından narazı olduqlarını bildiriblər.

Məsələyə münasibət bildirən Azərbaycan İnternet Forumunun prezidenti  Osman Gündüz Xeberler.az-a bildirib ki, yerli operatorların  qiymətləri qaldırmasının  əsas səbəbi güman ki, manatın devalvasiyası ilə bağlıdır.

“Düşünürəm ki, bunun əsas səbəbi manatın devalvasiyasıdır. Yerli kabel televiziyaları xaricdəki TV  kanallarla hesablaşmaları, aldıqları xarici kontentin ödənişini valyuta ilə aparırlar. Güman ki, dollar bahalaşdığından bununla bağlı  yerli operatorlar qiymətləri qaldırmalı olublar”.

Osman Gündüz qeyd edib ki, elə  istifadəçilər ola bilər ki, bu xərcləri ödəməyə imkanı çatmaz. Forum rəhbəri hesab edir ki, operatorlar az təminatlılar, xərci ödəyə bilməyən şəxslər üçün müəyyən kampaniyalar keçirib, güzəştlər tətbiq edə bilərlər.

Ekspert  vurğulayıb ki, operatorların qiymətləri qaldıracaqları halda TV və internet xidmətlərinin  keyfiyyətini, paketə daxil olan kanalların sayını,  ümumiyyətlə, xidmətlərin çeşidini də artırması yaxşı olardı.

Sevinc Çəltikova