İNNOVASİYA VƏ STARTAP

KATV1 biznes-layihələr müsabiqəsi  elan edib.

Müsabiqə çərçivəsində ən yaxşı ideyaların gerçəkləşməsi üçün imkan yaradılacaq.

KATV1-dən Xeberler.az-a  verilən məlumata  görə, müsabiqənin əsas fərqi layihələrin ideya mərhələsində qəbul edilməsidir. Belə ki, ən yaxşı ideyalar  KATV1-in dəstəyilə reallaşdırıla bilər.

Müsabiqənin sonunda üç ən yaxşı layihənin komandaları KATV1-ə dəvət edilib layihələrinin reallaşdırılması üçün hərtərəfli dəstəklə təmin olunacaq. Razılaşma çərçivəsində KATV1 şirkətin dəstəyilə həyata keçiriləcək biznes-layihədə pay sahibi olacaq.

Təqdim olunacaq layihələr aşağıdakı meyarlar üzrə qiymətləndiriləcək:

Layihənin uğurla reallaşdırılması üçün komanda;

Azərbaycan bazarı üçün əsaslandırılmış biznes-model;  

Növbəti mərhələlər üçün inkişaf potensialına malik xidmətin və ya məhsulun aydın təsviri;

İdeyanın biznes üçün yararlığı: gəlir əldə etmə imkanı;

Cəmiyyət üçün sosial dəyər.

 Layihələrin müsabiqəyə qəbulu martın 15-nə qədər davam edəcək.

Seçilmiş layihələrin komissiyaya təqdimatı 25-30 mart tarixlərində keçiriləcək. Təqdimatdan sonra qaliblər seçilərək elan ediləcək.  

Müsabiqədə iştirak etmək üçün layihələri (təqdimat və ya layihənin təsviri) [email protected] ünvanına göndərməlisiniz.

KATV1 yeni biznes-məhsulların dəstəklənməsi və yaradılması istiqamətində apardığı işlərinə görə ən fəal şirkətlərdəndir. Hazırda KATV1-in dəstəyilə Myvideo.az, 119 çağırış-mərkəzi, AGFM radiokanalı, TMB beynəlxalq musiqi telekanalı və s. bu kimi layihələr uğurla fəaliyyət göstərir. 2016-2017-ci illərdə nəinki Azərbaycan, həm də region bazarlarına istiqamətlənən bir neçə biznes-layihənin reallaşdırılması da planlaşdırılır. 

Məltəm Talıbzadə