TEXNOLOGİYA

KOB subyektlərinə investisiyanın yatırılması sərfəli yatırım imkanları axtaran investorlar üçün cəlbedici seçim ola bilər.

Bunu İqtisadiyyat Nazirliyi yanında Kiçik və Orta Biznesin İnkişafı Agentliyinin (KOBİA) İdarə Heyəti sədrinin müavini Rüfət Atakişiyev Bakıda keçirilən "Dayanıqlı maliyyə və investisiya" mövzusunda II Bakı Forumunda bildirib.

"Bir sıra aspektlər baxımından KOB subyektlərinin investisiya imkanlarına diqqət çəkmək istərdim. Bir çox hallarda, KOB-lar böyük şirkətlər ilə müqayisədə daha yüksək artım potensialı nümayiş etdirir. Kiçik bizneslər daha çevik olduğu və dəyişkən bazar mühitinə daha yaxşı adaptasiya ola bildiyi üçün, onlar asanlıqla böyüyə bilirlər. Bu baxımdan, yüksək gəlirlilik axtarışında olan investorlar üçün KOB-lar cəlbedici imkanlar təmin edir. Digər tərəfdən, KOB-lara investisiya yatırmaqla investorlar investisiya portfelini diversifikasiyası etmiş olur və vəsaitlərin bir sənaye sektoru və ya aktiv növünə konsentrasiya olunması ilə bağlı yarana biləcək riski azalda bilirlər. İnvestorlar kapitalı müxtəlif sektorlarda fəaliyyət göstərən kiçik bizneslərə yatırmaqla bazar volatilliyi ilə bağlı yarana biləcək mənfi təsirləri yumşalda və investisiya portfelinin sabitliyini artıra bilərlər", - deyə o qeyd edib.

Sədr müavininin sözlərinə görə, KOB-ların investorlar üçün təklif etdiyi imkanlardan biri də innovativ biznes modellərinə çıxış imkanıdır.

"Geniş innovasiya potensialına malik olan bu dinamik bizneslər çox vaxt müasir, yeni məhsul və xidmətlər yaradırlar. Bu baxımdan, investorlar KOB subyektlərinə investisiya yatırmaqla yeni bazar və texnologiyalara çıxış imkanı və uzunmüddətli dövr üçün artım perspektivi əldə etmiş olurlar. KOB-lara investisiya yatırmasını təşviq edən amillər sırasında, heç şübhəsiz, sosial məsuliyyəti də qeyd etmək lazımdır. KOB-lara investisiya yatırmaqla fərdi investor mənfəət əldə etməklə yanaşı, ölkənin iqtisadi inkişafına, yeni iş yerlərinin yaradılmasına töhfə verir. KOB-lar əksər iqtisadiyyatların əsasını təşkil edir, məşğulluq və əlavə dəyərin yaradılmasında böyük paya malik olurlar. Bu bizneslərinin inkişafının dəstəklənməsi geniş anlamda iqtisadiyyata müsbət təsir göstərir. KOB subyektləri kənar investisiyaların cəlbi üçün imkanlar təmin etməklə yanaşı, özləri də biznes fəaliyyəti çərçivəsində ölkə iqtisadiyyatına investisiya yatırırlar" – deyə o əlavə edib.