TƏHLÜKƏSİZLİK

Kibertəhlükəsizlik məsələsi artıq hər bir ölkənin milli təhlükəsizliyinin mühüm elementi olmaqla yanaşı, kiçik və orta biznes subyektləri baxımından da xüsusi əhəmiyyət kəsb edir. Ölkəmizdə 400 mindən artıq mikro, kiçik və orta müəssisə fəaliyyət göstərir ki, onlar ümumi bizneslərin 99,7 faizini təşkil edir”.

Xeberler.az məlumat verir ki, bunu Kiçik və Orta Biznesin İnkişafı Agentliyi (KOBİA) İdarə Heyətinin sədri Orxan Məmmədov “Critical Infrastructure Defence Challenge-2025" tədbirində çıxışı zamanı deyib.

Onun sözlərinə görə, iri müəssisələrlə müqayisədə məhdud resurslar şəraitində fəaliyyət göstərən KOB subyektləri çox zaman bahalı kibertəhlükəsizlik texnologiyalarını almaq və ya işçiləri üçün təlimlər təşkil etmək imkanına malik olmur.

“Hətta bir çox hallarda onlar potensial təhlükədən belə xəbərsiz olur. Bu isə kənar qüvvələrin asanlıqla istifadə edə biləcəyi boşluqlar yaradır. Belə vəziyyət bütövlükdə iqtisadiyyatın həssaslığına səbəb ola bilər. Kiçik biznesə edilən hücum “domino” effekti ilə digər KOB-lara, iri müəssisələrə, hətta dövlət qurumlarına keçə bilər. KOB-ların kibertəhlükəsizliyinin təmin edilməsi milli səviyyədə dayanıqlılıq üçün həyati əhəmiyyət daşıyır. Bu baxımdan kibermüdafiə məsələsinə kollektiv yanaşma tələb olunur və bütün maraqlı tərəflərin əməkdaşlığı vacibdir”, - deyə KOBİA sədri qeyd edib.

Kiçik və orta biznes subyektlərinin rəqəmsal transformasiyasının dəstəklənməsi və kibertəhlükəsizlik biliklərinin artırılması istiqamətində müxtəlif mexanizmlər tətbiq edildiyini sözlərin əlavə edən Orxan Məmmədov bildirib ki, 2020–2024-cü illərdə bizneslərin proqram təminatı və İKT avadanlıqlarına xərcləri təqribən 2,4 dəfə artaraq illik 370 milyon manatdan çox olub: “2023-cü ildə KOB-ların elmi-tədqiqat xərcləri isə 18 milyon manatdan artıq təşkil edib. Bu, KOB sektorunun innovativ və rəqəmsal inkişafa marağının göstəricisidir. KOBİA tərəfindən rəqəmsal təşəbbüslərin dəstəklənməsi üçün bir sıra alətlər mövcuddur. Onların sırasında 3 il müddətinə vergi güzəşti verən “Startap” şəhadətnaməsi, bazar araşdırmalarına maliyyə dəstəyi, rəqəmsal təşəbbüslər üçün qrant mexanizmi, həmçinin KOB inkişaf mərkəzlərinin təşkil etdiyi təlimlər və məsləhət xidmətləri yer alır. “Bakı KOB evi”ndə fəaliyyət göstərən Startap İnkişaf Mərkəzi gənc sahibkarlara avadanlıq, ekspert, mentorluq və dizayn dəstəyi təqdim edir. Ümumilikdə isə dövlət və özəl sektor əməkdaşlığının genişləndirilməsi kiber təhlükələrə qarşı effektiv mübarizə üçün əsas şərtlərdən biridir”.