E - HÖKUMƏT

Uzun müddətdir Nəqliyyat, Rabitə və Yüksək Texnologiyalar Nazirliyinin yeni saytının hazırlandığı qeyd edilir.

Məlum olduğu kimi, ötən il, fevralın 13-də Prezident İlham Əliyevin sərəncamı ilə Nəqliyyat Nazirliyi ləğv edilərək Rabitə və Yüksək Texnologiyalar Nazirliyinə birləşdirildi. Həmin vaxtdan yeni yaranan Nəqliyyat, Rabitə və Yüksək Texnologiyalar Nazirliyində struktur dəyişiklikləri aparılmağa başladı.

NRYTN yeni yaranan saytın hazırlanması ilə bağlı bildirdi ki, nazirliyin Əsasnaməsi və Strukturu təsdiq edildikdən sonra sayt və domen ünvanı da zəruri dəyişikliklər edilərək ictimaiyyətə təqdim olunacaq.

Nazirliyin yeni əsasnaməsi də təsdiq edilib. Amma hələ də rəsmi internet resurs istifadəyə verilməyib.

Xeberler.az olaraq məsələnin nə yerdə olması ilə maraqlandıq. Bununla bağlı Nazirliyə rəsmi sorğu göndərsək də, sualımıza hələ cavab verilməyib.

Qeyd edək ki, hazırda əvvəlki Nəqliyyat Nazirliyinin saytı (www.mot.gov.az) NRYTN-in rəsmi saytına (www.mincom.gov.az) yönləndirilib. Amma platformada yeniləmə işləri aparılmayıb.

Müşahidəmiz göstərir ki, hazırda mövcud resursda nəqliyyat ilə bağlı bölmələr yer almayıb. Əsasnamədə qeyd olunan bəzi məsələlər də burada öz əksini tapmayıb. Güman ki, NRYTN-in təqdim edəcəyi yeni sayt həm də nəqliyyat sahəsini və son zamanlarda baş verən sahə ilə əlaqəli dəyişiklikləri əhatə edəcək.

Buna baxmayaraq, saytın bu qədər uzun vaxtda hazırlanması və hələ də ictimaiyyətə təqdim edilməməsi birmənalı qarşılanmır.

Məltəm Talıbzadə